بەهۆی هێرشەکانی سوپای تورکەوە بۆ سەر #عەفرین#، 300 خوێندنگا داخراون، بەوهۆیەشەوە 400 هەزار خوێندکار لە ناتوانن بەردەوامیی بە خوێندن بدەن.
بەهۆی تۆپبارانەکانی سوپای تورک-ەوە، کۆمیتەی پەروەردەی کۆمەڵگای دیموکراتی کانتۆنی عەفرین، بڕیاری داوە کە خوێندنگاکان دابخات و وەزری دووەمی خوێندنی ساڵی 2017-2018 ڕاگرێت.
لەوبارەیەوە، ئەمیرا حەمۆ، مامۆستا، بۆ ئاژانسی هاوارنیوز قسەیکردووە و وتوویەتی، کە بەهۆی بۆردوومان و تۆپبارانەکانی سوپای تورکەوە بۆ سەر عەفرین، بۆ پاراستنی سەلامەتی خوێندکاران، بڕیارماندا کە کردنەوەی خوێندگاکان دوابخەین.
خوێندکارە عەرەبەکانی عەفرین، دەڵێن:بەهۆی تۆپبارانەکانی سوپای تورکەوە، ناتوانین لە کۆڵانەکاندا یاری بکەین، دەمانەوێت بچینەوە بۆ خوێندنگاکانمان و خوێندنمان بەردەوام بکەین.
جێگای ئاماژەپێکردنە، لە ڕۆژی 17-09-2017 ەوە، 300 خوێندنگا لە عەفرین لەلایەن کۆمیتەی پەروەردەی کۆمەڵگای دیموکراتییەوە کراوەتەوە، لەو خوێندگایانەدا، نزیکەی 400 هەزار خوێندکار دەخوێنن.
ئەمە لەکاتێکدایە، لە ڕۆژی 20 ی ئەم مانگەوە، سوپای تورک هێرشی بۆ سەر کانتۆنی عەفرینی ڕۆژئاوای کوردستان دەستپێکردووە، بەهۆی ئەو هێرشانەشەوە، سەدان هاوڵاتی مەدەنی شەهید و برینداربوون، کە زۆرینەیان ژن و منداڵن، هەروەها زیانێکی زۆر بە ماڵ و موڵکی هاوڵاتیانیش کەوتووە.[1]
#26-01-2018#