- جەماوەری وڵاتپارێزی کوردستان...
- حزب و لایەن و ڕێکخراوەکانی کۆمەڵگەی مەدەنی...
- کەسوکار و بنەماڵەی سەربەرزی شەهیدانی کوردستان...
دوای دەستگیرکردنی چەندان پەرلەمانتار و سەرۆک شارەوانی و هاوسەرۆک و کادیرانی HDP له باکووری کوردستان و داگیرکردن و تاڵانکردنی عفرین و جینۆسایدکرنی خەڵکەکەی لە ڕۆژئاوای کوردستان لەلایەن تورکیاوە، چەند ڕۆژێکە سوپای خوێنڕێژی تورکیا جارێکی دیکە بەقوڵایی 15کم له سنووری ناحیەی سیدەکان، سنوری خاکی باشووری کوردستانیان بەزاندووە و ئەمشەویش لە دەڤەر‌ی باڵەکایەتی بەهۆی بۆردمانی فرۆکەکانی ڕژێمی داگیرکەری تورکیا چوار هاوڵاتی سڤیل شەهیدبوون.
پەلاماردان و تۆپبارانکردن و لەشکرکێشی سوپای تورکیا بەهۆکاری بوونی گەریلاکانی پارتی کرێکارانی کوردستان نیە، بەڵکو هاتنی ئه و سوپایە بۆ داگیرکردنی باشووری کوردستانە و دەیەوێ بنکەی سەربازی زیاتر دابنێ و تاقمی تیرۆریستی داعش و نوسرە لە قەندیل جێگیر بکات و دۆزی گەلی کوردستان بچوک بکاتەوە.
پەلاماردان و هێرشەکانی تورکیا بەپێی بەرنامەڕێژی ئه و دەوڵەتەیە بۆ داگیرکردنی کوردستان و بەرپرسانی تورکیا نایشارنەوە ئەوەی لەعفرین کردوویانە لەباشووری کوردستانیش دەیکەین و، بەپێی ئەزمونەکان تورکیا بچێتە هەر شوێنی جێی ناهێلێێ بۆ نمونە لەحەفتاکانەوە چۆتە ناو بەشێک لە قوبرس و نەکشاوەتەوە، لەهەمان کاتدا تورکیا دوژمنی سەرسەختی گەلی کوردستانە و بە درێژایی مێژوو هەموو کات دژی کیان و دەستکەوتی کورد وەستاوەتەوە، باشترین نمونەش هێنانە کایەی پەیمانی لۆزان بوو لەجێگەی سیڤەر.
ئێمە لە#یەکێتی نەتەوەیی دیموکراتی کوردستان# YNDK لەشکرکێشی و هاتنی سوپای تورکیا بۆ ناو خاکی باشووری کوردستان و شەهیدکردنی چوار گەنج لەدەڤەری باڵەکایەتی بە توندی ئیدانە و مەحکوم دەکەین و داوا لە سەرجەم هێزو لایەنه سیاسییە‌کان و حکومەت و پەرلەمانی کوردستان دەکەین، درک به و مەترسیە گەورەیەی هاتنی سوپاسی تورکیا بۆ باشووری کوردستان بکەن و لەرێگەی ڕێکخراو و کۆمەڵگەی نێودەوڵەتی و نەتەوە یەکگروەکان، ئه و سنوور بەزاندن و هێرش و پەلامارانەی تورکیا بوەستێنن، لەبەرئەوەی مەترسی گەورە لەهاتنی ئه و هێزە بەدیدەکرێت و کارەسات و جینۆسایدی دیکە لە لایەن تورکیا بەسەر گەلەکەمان دەهێندرێت.
- مردن و ڕوورەشی بۆ دوژمنان و داگیرکەرانی کوردستان.
- سەربەرزی بۆ چوار شەهیدەکەی باڵەکایەتی و گشت شەهیدانی کوردستان.
مەکتەبی سیاسیی
یەکێتی نەتەوەیی دیموکراتی کوردستان YNDK
#22-03-2018# هەولێر- باشووری کوردستان