ژمارەیەک لە چالاکوان و ڕۆژنامەنووسان لەژێر ناوی هەڵمەتی دادپەروەری 31 یەکەمین گردبوونەوەی خۆیان لەبەردەم پەرلەمانی هەرێمی کوردستان ئەنجامدا و یاداشتێکیان پێشکەشی پەرلەمان کرد.
دەقی یاداشت و داواکارییەکان:
1- پێمانوایە دەبێت چاکسازی لە لوتکەوە لە خانووە ملیۆن مەترییەکانتانەوە دەست پێبکات، ناکرێت ئێوە لە خانووی ملیۆن مەتریدا بژین و خەڵکانیش مەترێک زەویان نەبێت، پارێزگاری لە هەرێمی کوردستانیش بەوان بسپێردرێت، لە بارودۆخی وادا باسکردنی چاکسازی و وتنەوەی عەدالەت شەرمە.
2- موچەی بنەڕەتی پلە باڵاکان بۆ نیوەی ئێستای کەمبکرێتەوە، بۆ ئەوەی جیاوازی موچە کەمبکرێتەوە لە کوردستان کە بەرزترین ڕێژەیە لە جیهان.
3- یاسای خانەنشینی پلە باڵاکان بە ئاستێک ڕێکبخرێت لە 2 ملیۆن زیاتر نەبێت بۆ ئەوانەی تەمەنی خانەنشینی دەیانگرێتەوە، ئەوانی دیش بگەڕێنەوە سەر کارەکانیان، ئەوەشی کاری نەبووە، بە پێی بڕوانامەو پسپۆرییەکەی دابمەزرێت، هاوکات وردبینی لە خزمەتی پێشمەرگایەتی و ڕۆژنامەنووسیان بکرێت، چونکە بەشێک لەوانە پێشتر خانەنشینی پلە باڵای پێشمەرگە بوون، کەچی ڕۆژێک پێش ڕاپەڕین بەشداری خەباتی چەکدارییان نەکردووە، ئەمەش سوکایەتییە بە خودی پێشمەگەی دێرین، کە خاوەنی سەروەری مەعنەوین.
4- بودجەی پارتەکان کە زیاتر لە 1%ی بودجەی کوردستانە، کەمبکرێتەوە بە ڕاستەوانە لەگەڵ بڕەکەی، واتا ئەو پارتانەی بەرزترین بودجەیان هەیە بەرزترین ڕێژەیان لێ کەمبکرێتەوە، بە ئاستێک کەمبکرێتەوە لە ملیارێک دینار بۆ مانگێک تێ نەپەڕێت بۆ هەر پارتێک، وەمافی سیاسی هاووڵاتیانی کوردستان پارێزراو بێت.
5- موچەی بنەڕەتی لە هەنگاوی یەکەمدا بۆ هەموو ئەو هاووڵاتیانەی کوردستان ببڕدرێتەوە کە هیچ سەرچاوەیەکی داهاتیان نییە، لە داهاتوودا هەموو هاووڵاتیانی کوردستان بگرێتەوە، بڕەکەی لە لایەن دەستەیەکی ئابووریزانەوە دیاریبکرێت، ڕیالیستی بێت لەگەڵ داهاتەکانی هەرێمی کوردستان، لە دابینکردنی ژیانێکی شەرافەتمەندانە بۆ سەرجەم خەڵکی کوردستان، هاوکات لە داهاتوودا دامەزراندن تەنها بۆ تاکەکانی ئەو خێزانانە بێت هیچ سودمەند نەبوون لە کەرتی حکومەت و سەرچاوەی داهاتیان نییە.
6- لانی کەمی موچەی خانەنشینی فەرمانبەران وەک عێراقی لێبکرێت و هیچ موچەیەک لە کوردسان بە چاودێری خێزانی ئەوانەی سەرچاوەی داهاتی تریان نییە لە 500 هەزار دینار کەمتر نەبێت.
7- دەست لە ئیمتیازاتی قوربانیانی جینۆساید و شەهید و زیندانی سیاسی بە هیچ شێوەیەک نەدرێت، ئیمتیازاتە بڕاوەکانیان بۆ بگەڕێننەوە، وە لیستی شەهیدان و زیندانیانی سیاسی و قوربانیانی جینۆساید و پێشمەرگەی دێرین بۆ ڕای گشتی بڵاو بکرێتەوە.
8- وێرانکردن و تاڵانکردنی کەرتی گشتی بۆتە تایبەتمەندی حکومەتی هەرێم، بۆ ڕاگرتنیان داواکارین:
أ- جیا کردنەوەی کەرتی گشتی و تایبەت لە ناوەندە تەندروستیەکان و گرنگیدان بە کەرتی گشتی لە دابینکردنی دەرمان و خزمەتگوزاری، بەرز کردنەوەی ئاستی گشتی هۆشیاری تەندروستی خەڵک، بازرگانی نەکردن بە تەندروستی خەڵک، نەهێشتنی دیاردەی حیزب لەو سێکتەرە گرنگە، چارەسەرکردنی بەرپرسانی حیزبی و حکومی و خێزانەکانیان لە نەخۆشخانەی گشتی وەک ڕێزلێنان لەو کەرتە نەک چوون بۆ هاندەران بۆ بچوکترین نەخۆشی.
ب- لە کەرتی پەروەردە پۆستی کارگێڕی بەکەسی لێهاتو بدرێت نەک بە کادیری حزب، چیتر حزب دەست لە کاروباری پەروەردە وەرنەدات، هەموارکردنەوەی وانەکانی خوێندن لەگەڵ ڕوحیەتی زانست و گەشەی زانست بە تایبەت شۆڕشی پیشەسازی بگونجێت، گەڕاندنەوەی منداڵانی بەرپرسانی حیزبی و حکومی و پەرلەمانتاران بۆ خوێندنگا گشتیەکان وەک ڕێزلێنانێک لە حکومەت و دەزگاکانی و کۆتاییهێنان بە سستەمی پارالێڵ کە هەنگاوێکە بۆ بە پارە کردنی خوێندن لە زانکۆکان لە ئایندەدا.
ج- کۆتاییهێنان بە پارەکردنی کەرتی ئاو و مانەوەی لە چوارچێوەی کەرتی گشتی.
د- دەستنەدان لە کەرتی کارەبا.
ی- ئەو پڕۆژانەی کەرتی گشتی کە پێشتر خۆیان بە خۆیان فرۆشتووە، یاخود زەوی، مەلەفەکانیان بۆ ڕایگشتی بڵاوبکرێتەوە و لێکۆڵینەوەیان لێبکرێت.
ن- باج بخرێتە سەر دەوڵەمەندان پڕۆژەی بەرپرسان.
ت- بەهیچ جۆرێک ڕێگا نەدرێت بەرپرسانی حیزبی و حکومی، بە تایبەت پارتە دەسەڵاتدارەکان، بە کەسانی پلە یەک و دویانەوە، چالاکی ئابوورییان هەبێت.
م- لانی زۆری موچەو لانی کەمی موچە لە کەرتی گشتی، لەگەڵ لانی کەمی کرێ و لانی زۆری کرێ لە کەرتی تایبەت بە یاسا دیاریبکرێت.
ن- بودجە بۆ پشتیوانی بەرهەمی خۆماڵی، کشتوکاڵی و پیشەسازی دیاریبکرێت لە پێناو بوژاندنەوەی.
هیوادارین پەرلەمانتارانی کوردستان لە گفتوگۆی پڕۆژە یاساکە وەک جاری پێشوو بیر لە ئیمتیازاتی خۆیان نەکەنەوە، تەنها بیریان لای ئەوە بێت جیاوازی موچەیی لە هەرێمی کوردستان لە زیاتر 300 جارەوە کەمبکەنەوە بۆ چەندین جار، ئاگایان لە سکی برسییەکان بێت نەک ئیمتیازاتە زەبلاحەکانی خۆیان، با شەرمەزاری خوێنی شەهیدان و ئێسک و پروسکی ئەنفالکراوان نەبن بەوەی موچەکانیان دەیان جاری ئەوان بێت.
هەڵمەتی دادپەروەری[1]
16-12-2019