گروپی هەماهەنگی ڕۆژنامەوان و چالاکانی کوردستان و دەرەوە، ڕاگەیەندراوێکیان لەبارەی دەستگیرکردنی ڕۆژنامەنووس #هێمن مامەند#، بڵاوکردەوە، کە نزیکەی مانگێکە لەشاری #هەولێر# دەستگیرکراوە.
ئەو گروپە لە ڕاگەیەندراوەکەیاندا دەڵێن: ماوەی زیاتر لە مانگێکە، (هێمن مامەند) ی ڕۆژنامەنووس دەستگیرکراوە، دەسەڵاتی یاسایی و جێبەجێکردن لە ژێر کاریگەریی حیزب و بەرپرسەکانیدا، دەستی دەستی بە دۆسیەکەی دەکەن، دەیانەوێت بەردەوامی بە سزا سیاسی و حیزبیەکانی سەری بدەن، زیندانیکردنی ئەو ڕۆژنامەنووسە لەسەر داواکردنی مافە شەرعی و یاساییەکانی خەڵک، هیچ پاساو و بیانوویەک هەڵناگرێت، جگە لە پێشێلکردنی مافی مرۆڤ و پرەنسیپە یاسایی و ئەخلاقیەکان لەلایەن دەسەڵاتی حیزبیەوە.
هەروەها دەڵێن: کردنەوەی چەندین دۆسیەی دروستکراو بۆ (هێمن مامەند)، تەنها لەبەر ئەوەی هۆشداری لەبارەی لە خراپی ژیان و گوزەرانی خەڵک داوە، بە هەوڵێکی جدی دەسەڵاتداران دەبینین، بۆ لەقاڵبدانی ئازادی و بێدەنگکردنی دەنگە ئازاو ئازادەکان، تا لە غیابی دەنگە دلێرەکاندا، درێژە بەم دۆخە حوکمڕانیە حیزبیە شکستخواردووە بدرێت، لێرەوە هەموو لایەک ئاگادار دەکەینەوە، دەستگیرکردن و زیندانیکردنی دەنگە ئازا و ئازادەکان نەک پاشەکشەیان پێناکات، بەڵکو مکوڕتریان دەکات لەبەرەنگاربوونەوەی ئەم حوکمڕانیە حیزبیە، کە ناوبانگی هەرێمەکەمانی لای دونیای دەرەوە و کۆمەڵگای نێودەوڵەتی ناشیرین و لەکەدار کردووە.
لەکۆتایشدا هاتووە: هەموو ئەو ڕێکارانە ڕەتدەکەینەوە، کە بەرامبەر (هێمن مامەند) گیراونەتەبەر، چونکە نایاسایین، جگە لە مامەڵەکردنیش بە یاسای ڕۆژنامەگەری ژمارە (35)ی ساڵی (2007)، هەر جۆرە مامەڵەکردنێکی تر ڕەتدەکەینەوە، هەمووانیش دڵنیا دەکەینەوە، زوڵم و ستەمە بەردەوامەکانی دەسەڵاتی حیزبی دەرهەق بە (هێمن مامەند) قەبوڵ ناکەین، جگە لە ئاگادارکردنەوەی ڕێکخراو و کونسوڵخانە نێودەوڵەتیەکان، لە ناوخۆی هەرێمیش هەنگاوی کرداری دەگرینەبەر، بۆ هەڵگرتنی ئەو ستەمە گەورە، داوا لە ڕێکخراو و میدیاکانیش دەکەین، پاڵشت و پشتیوانمان بن.[1]
#25-04-2020#