مەڕۆ مەڕۆ بابە مەڕۆ
سروودی مەڕۆ مەڕۆ بابە مەڕۆ، وتنی: #حەمە جەزا#
منداڵەکانی (تەها، هونەر، بەناز، ڕێزان) لە کۆرسەکەدان.
لە شاری (#سەقز#) ی ڕۆژهەڵاتی کوردستان ساڵی (1990) تۆمار کراوە.
وەرگیراوە لە: عەبدولواحید ئیدریس [1]
مەڕۆ مەڕۆ بابە مەڕۆ بۆ جێمان دێڵی
تا کەی ژیان بەرینە سەر هەروا بە وێڵی
تا کەی خەمی ئەم میللەتە بگرینە باوەش
تا کەی لە سۆزی باوکێتی ئەمانکەی بێبەش
ئەڕۆم ئەڕۆم ئەڕۆم
ئەڕۆم ئەڕۆم زویر مەبن وردیلەکانم
تا سەربەستی وەدەست دێنم بۆ کوردستانم
تاکوو نەخشەی ئەم وڵاتە نەگۆڕینەوە
دڵنیا بن ڕۆڵەکانم ناگەڕێینەوە
مەڕۆ مەڕۆ بابە مەڕۆ بۆ جێمان دێڵی
تا کەی ژیان بەرینە سەر هەروا بە وێڵی
تا کەی خەمی ئەم میللەتە بگرینە باوەش
تا کەی لە سۆزی باوکێتی ئەمانکەی بێبەش
ئەڕۆم ئەڕۆم ئەڕۆم
ئەڕۆم ئەڕۆم بێناز مەبن وردیلەکانم
لەم کاروانە بەجێ ماوم لە هاوڕێکانم
ئەڕۆم ئەڕۆم زویر مەبن وردیلەکانم
لەم کاروانە بەجێ ماوم لە هاوڕێکانم
ئێوەش پاک بن بۆ نەتەوە و خاک و وڵاتتان
لە دواڕۆژا بەسەربەرزی دێمەوە ناوتان، دێمەوە لاتان
مەڕۆ مەڕۆ بابە مەڕۆ ئێمەش ڕێت ئەگرین
مەتارەی ئاو چارۆکەی نانتان بۆ هەڵدەگرین
ژیانی شار مانەوەمان ئەم ماڵ ئەو ماڵە
ڕاکردنە ئەشکەنجەیە ژەهرێکی تاڵە
نابێ نابێ قەت ناڵەی جودایی بێئەسەر
جا چ نەی بیکا چ پیاوی دەربەدەر
بۆیە ناڵەم تێکەڵی نەی کردووە
شیوەنێکم پێیە نەی نەیکردووە
شیوەنی من شیوەنی ئینسانییە
بانگی ئازادی و گڕووی یەکسانییە
شیوەنی من شینی کوردی بێبەشە
ئەو گەلەی حاشا دەکەن لێی و هەشە
ئاخ ڕۆڵە
پارچە گۆشتێکە دڵی من ڕوو نییە
ناڵەناڵی من درەنگە زوو نییە
ئەڕۆین ئەڕۆین گشت پێکەوە بۆ ئەم شۆڕشە
بۆ خەباتی سەخت و دژوار تێشو و کۆششە
یا هەموومان لەم ڕێگایا خوێنمان دەڕژێنین
یاخود چرای ئازادیی کورد دائەگیرسێنین[2]