خەجاڵەت
من کە خەجاڵەت خزمەت ئاما پېم
جەهەڼەم سەڎ ساڵ دۊزەخ بۊ وە جېم
مەولەوی
پیا ئیماندارەکۍ، کەسە دین ڕاسەکۍ و زاهیدە خوڎاتەرسەکۍ و عاریفەکۍ، نە پەی دەسکۆتو بەهەشتی و نە جە تەرسەو جەهەڼەمۍ خوڎاپەرەسی نمەکەران. ئاڎۍ تاکە وایەشان بەس دەسکۆتەی وەشەویسی خوڎایەن.
ئاڎۍ عەشق و زاتو حەقی مەیاونوشا پلېوە جە کەماڵی پېسە مەولەوی ماچۊ:
دەماخ وە نەشئەی سەربەرزان کەیل
مورشیدی میراو سەرجۊی بادەی لەیل
دەماخشان یاوان ئاستێ، کە ئیتر عەشقو زاتو حەقی دڵشان ڕۊشن کەرۊوە.
مەولەویچ تەرسیش جە مەردەی نیەنە، تەرسیش جە ئایېرو جەهەڼەمی نیەنە، بەڵکم تەرسیش جە خەجاڵەتی و ڕوو زەردیشەن وەردەمو خوڎاینە، کە جە ساحەو مەحشەرینە بە بارێ گوناحېوە وەردەمشەنە مدران.
مەولەوی دڵش بە چەرمەیی موا سەرو ڕیشیش وەشەن، چونکم وەردەمو زاتو هەقینە ڕۊخسارش کە سیاوی گوناحان مەپۊژنۊرە.
سفیدیت قەڵغان پەی ڕووی سیات بۊ
کەمانیت شەفیع تیری دیات بۊ.
[1]