شێلادزێ، ئەسعەد ڕێکانی:
ئێکەم کەلەک کو بۆ بەریا دەھان سالان ڤەدگەریت و ژ کەڤەلێ بزنا و پەزی ژلایێ خەلکێ گوندێ سیریا کەڤن ل کومەلگەھا سیریێ یاسەر ب ناحیا شێلادزێ ڤە ل سەر ڕووبارێ شین ھاتبوو دروستکرن بۆ ھاتن و چوونا پێشمەرگەی و ڕێڤینگا و ڕێڤەبرنا کاروبارێن خەلکی بۆ پێکڤە گرێدانا دەڤەرا بارزان وئامێدیێ دھێتە زانین.
حەجی عەبدولا سیری ل سالا 1963ێ ڕوژنامەڤانەکێ فەرەنسی ب ناڤێ (فرانسوا گزاڤیێ لۆڤا) ل کەلەکا خۆ یا سادە ل ڕووبارێ شین دەبازکرە دەڤەرا بارزان بۆ ڕوومالکرنا ڕوودانێن شۆرەشا کوردی کو ئەڤ وێنەیێن کەلەکێ ژلایێ وی ڕوژنامەڤانێ فەرەنسی ڤە ھاتینە کێشان و د پەرتوکا خۆە دا دبێژیت: ئەم ل ڕووباری دەربازبووین ب کەلەکەکا کەڤن و سادە کو ژ پیستێ بزنا ھاتبوو دروستکرن کو ل دەمەکێ دا ئاشوریان بەری 2500سالان بکاردئینان.
فاتیمە جەھوەر د ژیێ 78 سالیێ دایە خەلکا گوندێ سیریا کەڤن یا سەر ب ناحیا شێلادزێ ڤە کو دبیتە ھەڤژینا خودێ ژێ ڕازی حەجی عەبدولا عەرەفات سیری کەلەکڤانێ سەر وی دەمی د دیدارەکێ دا بۆ ڕوژنامەیا ئەڤرۆ دیارکر کو دروستکرنا کەلەکا گوندێ وان بو دەمەکێ دوور و کەڤنار ڤەدگەریت.
زێدەتر گۆت: ل بیرا مە نەبوو دەمێ ئەڤ کەلەکە ھاتیە دروستکرن ل سەر دەمێ باپیرێ بنەمالا عەرەفاتێ سیری ڤە کار پێ دکر و پشتی وەغەرکرنا وی ژلایێ کورێ وی حەجی عەبدولای ڤە بەردەوامی دا کارێ کەلەکڤانیێ ئەو دەمێ بیرا من دھێت ل سالێن شێتان دابوو دەمێ حەجی عەبدوولا قەستا دەڤەرا ڕێکانیا دکر و گوندبەر گوند دا چیتێ و کەڤلێن بزنا کۆم دکرن و دئینانە مال و ل شوونا چووپی ب کاردئینان بۆ کەلەکێ کو ھینگی ئەڤ چووپێن نوکە نەبوون.
ئەو بو ل دەستپێکا سالێن شێستان دا کەلەک دروستکرەڤە و حەجی عەبدولا و حاجی موحەمەد بالندی کار دکر و ل وی دەمی ژی ھاتن و چوونا پێشمەرگەی بۆ دەڤەرا ئامێدیێ و ئاکرێ بەرفرەھتر لێ ھاتبوو، ژ بەر کو شورەشا ئیلونا مەزن ھاتبوو دەستپێکرن ژ بەر فرەھبوونا کاری. ئەو بۆ ڕەشید عەبدولرەحمانێ سیری و تاھا موحەمەدێ سیری بوونە شریک و پێکڤە کار دکر و ئەگەر داھاتەک ژی ھەبوو بۆ خوە لێکڤە دکر و ئەڤ کارە یێ بەردەوام بوو ھەتا سالا 1975ێ شول دکر، پشتی ھینگی ڕاوەستیا، ژ بەر کو ل وی دەمی ڕژێما بەرێ یا عیراقێ پرەکا دەمکی ل سەر ڕووبارێ شین دروستکر.
گۆت ژی: کەڤلێن بزنا دا ئینن کەنە د ئاڤێ دا ھەتا نەرم د بوون و پاشێ دا گولوێرا ئینین دا ھویرکەین دا ل سەر ئاگری کەلینن و دا بیتە گەمار و پاشێ ئەو کەڤلێن بزنا دا کەنە دئاڤا گولوێرا دا کو ھینگی دگووتێ گەمار ژ بۆ ھندێ بوو دا پتر یێ قائیم بیت و دا پتر بەرگریا سەرمایێ و ئاڤێ بکەت و ئەگ ڕ کون ل کەڤلی ھەبانە دا باش گرێدەن، وەکی مەشکا بوون و دا ھەوای کەنێ ھەتا باش دھاتە پڤدان، پشتی ھینگی دا بەن ل وان تانا ڤە گرێدەن کو ژ تەرشڤکێن بیھوک و سپیندارا د ھاتنە چێکرن و زۆر زەحمەت د بر کو نێزیکی چاردە مەشکا ب کەلەکێ ڤە دگرێدان، ئەو ژی سێ چوار کەسەک ب تنێ ڕادگرتن نەشیان زێدەتر بارکەن ھەتا کو ل ڕووباری دەربازدکرن.
فاتیمە جەھوەر ئەو ژی گۆت: ئەو کەلەک ل سەر ڕووبارێ شین و زێیێ مەزن دھاتە بکارئینان و دەڤەرا مە و بارزان و ئاکرێ پێکڤە گرێددا، ژ بەر کو ل وی دەمی چو پر و ڕێک نەبوون ل ئاڤێ دەربازببن و ب ڕێکا ڤێ کەلەکێ ھاتن و چوون ھەبوو بۆ دەربازکرنا پێشمەرگە و ھاوولاتیان و کارێن بازرگانی، ھەروەسا کەسێن بیانی ژی دھاتن و دەربازدبوون و وێنە بۆ ڤێ کەلەکێ دکێشان و زۆر خزمەتا دەڤەرێ یا ب ڤێ کەلەکێ ھاتیەکرن و نەخاسمە بێ بەرامبەر خزمەتا پێشمەرگەی دکر ل دەمێ شورەشێ و زێدەباری مالێن مە بۆ پێشمەرگە و ڕێڤینگا د ڤەکری بوون کو ل وی دەمی گوندێ مە ژ چوار پێنج مالەکا پێک دھات و زیدەباری ڤی کاری حەجی عەبدولا پێشمەرگێ شورەشا ئیلونێ بۆ و ب مخابنی ڤە ل سالا 2016 د ژیێ 84 سالیێ دا ل نەخوشخانا ئازادی ل دھۆکێ وەغەرا دووماھیێ کر.
*بۆ زانین: وێنە ژ ئەرشیفێ ڕۆژنامەڤانێ فرەنسی (فرانسوا گزاڤیێ لۆڤا ) کو سالا 1963ێ ئەڤ وێنە کێشاینە ھاتینە وەرگرتن.[1]