داستانۊ شېخی سەنعانی
بەشۊ ویس و یەکەمۍ
تەرسای گاۋرە ماچۊ: ئېشەو پېخامئاوەرو ئیسلامی ئامانە وەرمم، چەمېم بە نوورویش ڕۊشنۍ بیێ، منش ڕزگار کەردا، ئیمانم پەنە ئارد، مەشیۊم گردیمان بلمېنە سەرو دینو ڕەسوولی، تەرسا وېش ۋست ملو پەیاو شېخی سەنعانیرە و پېسە وەشتی هەڵسی مجېرە.
ئېشەو من ڕەسوول ئامان نە خاوم
ڕۊشن بیی، جە نوور، ڕۊشنی چاوم
جە یانەی تاریک من ئامام وە بەر
قایېل بیم بە زات، ڕەسوولی سەروەر
مەبۊ حەرفی من، بکەران قبووڵ
گردیمان بشین، بە دینی ڕەسووڵ
ئېد واتش: ئاما تا بە لای یاران
مەڕېزان نە چەم، ئەسرین چوون واران
کەفت نە دەست و پای شېخی ئەندوبار
واتش: ئامانەن، زینهار سەڎ زینهار
بۊ بە عیشقی پاک، دەهەندەی داوەر
بېزارم جە دین، موسوڵمانم کەر
سەنعان ئېد ئەژنی، خەیلێ بی خۊشحاڵ
ڕوو کەرد وە بارگەی بەرزی لا یەزاڵ
وات: شوکرم بە تۊ پادشای غەففار
تۊ بەخشای گونای بەندەی شەرمەسار
وەختێ ڕەزات بۊ، حەیی لا یەنام
تەرسا، ماوەری بە دینی ئیسلام
گرد کەردەی وېتەن، زاتی سوبحانی
بە سەنعان مەدەی، فەرقەی ڕەهبانی
جە مەغرووری وېم، ئی بەندەی بەخت
کەفتم نە سزای، مەینەتانی سەخت
شەیتان، بە ڕام بەرد فەخرم بەردەوە
شیشەی نامووسم ، دا وە بەردەوە
تەقسیرم چېشەن، چکۊن تاوانم
کەردی وە چوپان، جەرگەی خووگانم.[1]