باخچێوە بېگەرد
نویستەی: میرزا ئۆلقاڎرو پاوەی
بەشۊ ویسەمۍ
شەیتان نەتاواش حەزرەتو ئاڎەمی خەڵەتنۊ، پەوکەی پەناش بەردە پەی لاو (حەوێ) و بە فڕووفېڵ و دروەدای تاواش خەڵەتنۊش، ئاڎییچە بە یارمەتی (تاوسی) و بە شایەتی (ماری) و تاواش ئاڎەمی ڕازیکەۊن:
ئاڎەم شناسا، واتش: ئەی لەعین
تۊ بشۊ پەی وېت، بکەر زاری و شین
وە تەوقی لەعنەت، هەر گرفتار بای
تا(قام القیام)، هەر شەرمەسار بای
جە (ئادەم) ویەرد، وە (حەوا) یاوا
وېش کەرد، وە خادم، جەڼەتلماوا
واتش وە حەوا: ئەلوان بپۊشە
گەندم، ئەکل کەر، تەهوور بنۊشە
حەوا وات: یە جای دەم بازی نییەن
چە تەور نۊش کەروو، حەق ڕازی نییەن
واتش: خوڎاوەند سەتتاری سڕ پۊش
منش کیانان، هەرچی بکەن نۊش
خیلافش نییەن، قەولی ئیلاهی
مار وە قەولی ئەو، هەم داش گەواهی
خولاسە، حەوا، بەختی وېش ڕەش کەرد
بەعزێ جە گەندم، فەوری، لەب چېش کەرد
گەندم، بەرد وەشیی، وەلای ئاڎەم
واتش: خوڎاوەند، منمانان کەرەم
من بەعزێ وەردم، تۊ هەم بکەر نۊش
با ئینتیزاریت، ببۊ، فەرامۊش
ئادەم وات: حەوا، زەعیفەی نەفام
ئەجزای مەعریفەت، عەقڵی ناتەمام
بادا، زوڵم بکەین، وە نەفسی وېمان
خوداوەند، غەزەب، مەگېرۊ لېمان
حەوا وات: مەلیک وە شاهیدی مار
دەستوورش ئاوەرد، جە لای شای غەففار
غەرەز ئەو بابای(عەلەیی سەلام)
وە کردەی (حەوا)، کەردش خەیاڵ خام
بەعزێ میوەجات، چەنی گەندم وەرد
وېش مەحروومی باخ، ڕەوزەی بەهەشت کەرد
بینای بۍ زەواڵ، ڕەنجیا لېشان
سزای قیامەت، نمانا پېشان
جەو مەلبووسی خاس، باخی بەهەشتە
جە گشت ئەنواعات، ئەو زیباو زشتە
مەلبووساتی خاس، فاخرەی بەهەشت
دیبای شیرین، هەم خوڎاوەند ڕەشت
لیباسی ئەعلای فاخرەی دولبەر
عوریان کەردەوە، جە پا، تا وە سەر
نیدایێ ئاما، واتش: یا ئادەم
وېت وست، نە تەوڕدام، دنیای پەڕ ستەم
ڕەزامەندی من، وە جا، ناوەردی
جە ئەوەڵ، قەدەم، بۍ ئەمری کەردی
پات کۊتا نەبۊ، هەرگیز جە غوربەت
کەم نەبۊ جە لات، غوسسەو زەلالەت
حەوا هەم جە حەیض، هەر با حەیض مەبۊ
هەر ماهی سێجار، حەیض جاری مەبۊ
نۊ ماهو نۊ ڕوژ، حەملش وەی تەورە
وە زەحمەت تیفلش، بکەرۊ گەورە
ماریچ تا مەحشەر، وە ڕووی دنیاوە
وە بۍ، پاو و دەست، بشۊ وە ڕاوە.[1]