زوڵەیخام نارە، زوڵەیخام نارە
زوڵەیخام جەمین شەوق نەهارە
حاجیبان دوو قەوس، قەزا کردارە
موژەش خەدەنگ جۆی ئەسفەندیارە
کتوونی دارات، ژار ئالووی ژارە
نێش ئەنە بەتەر، مەر گەستەی مارە؟
دیدە چەرخئاسای بادەی خومارە
نیشانەی ئەنگوشت پەروەردگارە
چەمبەرەی چەرخش عەقرەب ئاسارە
ساتێ وە سەد ڕەنگ نێشش وە کارە
دوو دەستەی کڵاف عەنبەربۆی بارە
بۆش خاستەر مەر بۆی میسک عەتارە
گاه ئەلفەن، گاه کاف، گاهێ مەیخوارە
گاهگاه وە سەیوان، نیمڕەس ئەنارە
گۆنایی گوڵگەشت، سێف خانسارە
گڕەش وە وێنەی دانەی ئەنارە
ئەر شا، ئەر گەداش، ئەگەر خونکارە
بەدتەر نافشان دڵ بێ جۆیارە
بێنێ نەخش زەڕ، تەڵای ئەفشارە
شەم نیسبەت شاهان، پێش ئینتزارە
لەب، لەعل عەقیق، مەتای مەهارە
خارا جە ڕۆمات بەڵخ و بوخارە
فەرهاد پەی دینش خەریک خارە
خوسرەو پەی خاڵش جگەر سەدپارە
گاهێ نەتۆنم، گاه نە گوفتارە
گاه شەهد، گاه شیرین، گاه گەوهەربارە
دەهەن سەرچەشمەی خزر ڕەهدارە
ئەسکەندەر وە جەخت پەی ئەو جۆیارە
سی و دوو دانەش گەوهەربێز بارە
بیرش نە مەرجان، بۆم گوڵنارە
زنج و زەنەخدان، تۆپ زەڕکارە
ئەنجووم نە دەورش سەف سەف هەزارە
خالێ نەسەر لەوح زەنجش دیارە
قەتتاڵ ئیمان، هەشت و چوارە
سەر لەوح سینەش دوو نەوڕەس نارە
نۆششان شیفای دەرد بیمارە
دوو دوگمەی یاقووت، وەنەش دیارە
گڕەش چوون ئەڵماس، تاج خوونکارە
ناف، ناف ئاهووی چەردەی کۆسارە
حەیاتبەخش ڕۆح مەردەی مەزارە
کاف و ناف و گەنج، نە چەم پێوارە
جایی سم غەزاڵ وەڵگ گوڵنارە
پۆشاکم جە کار کول خەبەردارە
خانا سەناگۆی ئەی سەنەمچارە
#خانای قوبادی# [1]