شای غەزالان، شۆخ و شەنگان، کرد خەدەنگان ڕاست و چەپ
دڵ چو سەنگان، خوو پڵەنگان، دای لە قەلبم ڕاست و چەپ
دای لە قەلبی من حەزینە، چەند خەدەنگی سەر بە خوینە
ئەو لە من کرد چەند برینە، خوێن بەخوڕ دێ ڕاست و چەپ
خوێن لە من دێ بێ قەرارە، وای لە خۆم بەدشووم ستارە
ڕۆبنیشن هەرچی یارە، بۆم بگریەن ڕاست و چەپ
بۆم بگریەن زۆر بەجۆشە، پێم نەماوە عەقڵ و هۆشە
ماری ڕەش یەکسەر خرۆشە، عەقرەبان گرت ڕاست و چەپ
مار و عەقرەب کرد هجوومە، ئەی لە خۆم بەدبەخت و شوومە
هێندەیان شیر لێ دەسوومە، دێنە جەنگم ڕاست و چەپ
دێنە جەنگم چەند هەزارە، هیندی و ڕۆم و تەتارە
تیر لە قەوسی وان دەبارە، جووت بە جووت دێن ڕاست و چەپ
جووت بە جووت وا دێن خەدەنگە، ڕۆژی ڕوونم لێ بوو تەنگە
دەستەیی هیند و فەڕەنگە، سەف بە سەف دێن ڕاست و چەپ
وا بەشیددەت دێنە خوارێ، دەستی من دامانی یارێ
خوێن لە چاوانم دەبارێ، جۆ بە جۆ دێن ڕاست و چەپ
جۆ بە جۆ سەر کرد لە دامان، فیرقەتی بێ حەدد و سامان
ئەز دەناڵم سوبح و شامان، سینە داغم ڕاست و چەپ
سینە داغ و دەردناکم، من لە دووی لوتفت هیلاکم
ڕوح و جانی خۆم فیدا کەم، ژێری نەعلت ڕاست و چەپ
ژێری نەعلت کوحلی چاوم، کوورەیی پڕ جۆش و تاوم
شیبهی پەروانە سووتاوم، دێمە گەردش ڕاست و چەپ
دێمە گەردش میسلی بادە، دڵ لەبۆیە نامرادە
ئاخ لە دەست جووتێک جەلادە، تیغ بە دەستن ڕاست و چەپ
تیغ بە دەستن، مەی فرۆشن، بۆ هیلاکی جان بەجۆشن
عاشقانت خوێن دەنۆشن، جورعە جورعە ڕاست و چەپ
سووت دەروونم وەک زوخاڵی، کەوتمە بەحری ئاه و ناڵی
ناپرسی جارێک لە حاڵی عاشقانت ڕاست و چەپ
ئەحمەدی کۆری حەزینە، دڵ لەسەر سیدق و یەقینە
یاری خۆت حازر ببینە، دوور و نەزدیک ڕاست و چەپ
#ئەحمەدی کۆر# [1]