باخچێوە بېگەرد
نویستەی: میرزا ئۆلقاڎرو پاوەی
بەشۍ: چل و دوەمە
کەشتیەکەو حەزرەتو نووحی جە شارو (کووفە) یۊ جمارەو یاوا بە شارو (مەککە) ی موبارەکی، کە نزیکو حەرەمی (یانەو خوڎای) بیۆ، حۆت جار دەورو کابەیرە سووڕیاوەو تەوافش کەرد، چاگۆ جمارە پەی جەزیرەی نزیک بە (کەشو جودی) .
کەشتی وە یەک، سات، بۍ زیاڎ و کەم
جە کووفە، یاوا، کەعبەی موعەززەم
جە ڕەئیس مەنبەع، بارەگای حەرەم
هەفت دەور کەرد تەواف، بەیتولموحتەرەم
پەنج مانگ، چوون یەک ڕۊ، کەشتیی گیرش وەرد
جە تۊفان، نووح، هەر دەورش مەکەرد
جەو دما، بە ئەمر، پادشای مەعبوود
شیی پەی جەزیرە، قەریب (کۊیی جوود)
لەنگەر وست نە ئاب، هەوادا، بەیرەق
کەشتیی جە گەردش، مدرا، موعەوەق
یەک ماهی کامڵ، تەوەققوف کەردش
دەورانی کەشتیی، بەڵخ ئاوەردش
ئەهلی کەشتی گرد، حاسڵ کەردەن یەئس
عاجز بین، تەمام، جە بۊیی نەجس
یەکسەر شین وە نووح، هانا بەردشان
جە گۊنەگی حاڵ، ئیزهار کەردشان
نووح هانا، بەرد، وە پەروەردگار
واتش: یا ڕەحیم، کەرەم بېشومار
نېیازی مەتڵەب، جوملەی کائینات
نیک و بەڎ، تەمام، گرد کەشفەن جە لات
ها ئەهلی کەشتیی، یەکسەر، ئەوگارەن
گرد زیندەگیشان، چوون، زەهری مارەن
[1]