داستانۊ حەیدەری و سنۊبەرۍ
بەشۍ شەسس و دوەمە
وەختێ حەیدەر و سنۊبەرە لوێنە دلۍ خاکو ئێرانی، سەڎ نەفەرۍ چەتۍ(دزۍ) ڕاشا وەنە گېرتۍ و دمای جەنگێ قارەمانانەی بەعزێشان کۊشیێ و ئەوۍ تەرېشان تەسلیمۍ بیۍ:
مەشیی چوون ئاهووی خووتەن چەڕیدە
پەیدابی نە ڕاش، سەڎ کەس تەڕیدە
هۊرېزان وە پا، دەس دان وە شمشېر
گرتەن دەوراندەور، نازداری کشمیر
واتەن: چکارەی ئەی ماهی تابان
خوڎا، شکارێ کیاستەن، پەیمان
سنۊبەر واتش: هەرزەی نابەکار
کەسێ چکارەن، من کەرۊ شکار
دەست دا، بە شمشېر ئەڵماسی بېڕام
کەفت نە دلېشان، وېنەی پووری سام
پېکا، بە ئەندام، یەکێ، جە دۊستان
بە زەربی شمشېر، نە خوون بی غەڵتان
یەکێ جە دززان، نا غافڵ پەی سەر
کەمەندش شانا، پەرێ سنۊبر
وە زەربی کەمەند کەردش گرفتار
بەستش هەر دوو دەست، ماهی جەهاندار
جەو دەمدا، حەیدەر ئاما، جە لاوە
وە ئەسپی گەیلان، جەهانپەیماوە
ئەسپش تەختەدا، دلېری سەفدەر
دەردەم شناسا، نازداری کیشوەر
واتش: هەی هانا، ئەی نووری دیدە
نەبی وە شکار، جەرگەی تەریدە
من چېگە دۊستاخ، دەستم بینیان
خەبەردارت کەم، ئەی نەوڕەسی جوان
حەیدەر بەگ ئەژنی شی، نە جامەی قین
مەهمېز دا بە ئەسپ، پەی ماهی پەروین
کېشا بە سەرد کەیانی قەڵغان
بە تا شی پەرێ خورشیدی تابان
دززان، هۊرېزان، بېشنۊ و بېدەنگ
گرتەن دەوراندەور حەیدەر بەگ بە جەنگ
حەیدەر بەگ کېشا، تېغی ئاتەش بیم
دا وە یەکێشان، کەردش وە دوو نیم
تاو پېکا بە ئەسپ، جوانی سالار
شاناش، پەی یەکێ، سەرەش وست بە وار
دا وە یەکێشان، شمشېری بېباک
دززی ناپاکش، غەڵتان کەرد نە خاک
شەس تەن، وست نە خاک جە ئەهلی دزان
باقی مەند لېشان، واتەن: سەڎ ئامان
کەفتەن دەس و پای، بانووی خەرامان
واتەن: ئەی نازدار، مەردیتەن ئامان
دەخیلمان بە تۊن، ئەی شەمسی خاوەر
جە دەستی ئەی شېر، ئېمە خەلاس کەر
سنۊبەر واتش: ئەی نووری دیدە
ببەخشە بە من باقی تەریدە
حەیدەر جە تەقسیر، گوناشان ویەرد
چەنی سنۊبەر، ڕوو بە ڕا، ئاوەرد
[1]