حیکایەت دکەن، مەلایەک د کوردستانێدا هەبوو، ناڤی مەلا بازید، ئەکسەری وەعز و شیرەت ددایە ئەکرادان، و ل مزگەفتێ نەسیحەت دکرن، و د وەعزیدا دگۆت: ئەی جەماعەتێ موسلمین، هەرچی کەسێ ژ وە دوو دەست جل و لباس هەبن، یەکی دڕیا خودێ دا بدەتە ژاران، و هەرچی کەسێ ژ وە دوو نان هەبن، یەکێ دڕیا خودێ بدەنە فەقیران، مەگەر ژنا مەلا بازید ژی هاتبوویە گوهداریێ، ئەڤ شیرەتێد مێرێ خوە مەلا بازیدی دبهیستن، وەکو ڤەگەریا و چوویە مالا خوە، دوو دەست جلێ مەلا بازید هەبوون، یەک بەرشوو بوو، یەک دشوشتن، و ئێ دنی بەرد کرن، ژنا مەلا بازیدی ئینان، ئەو دەستێ جلێد مەلای کو بەرشوو بوون، دایە ژاران و نیڤەکا نانێ حازر هەی، دایە فەقیران، ئیجارێ وەکو ئێڤارێ مەلا بازید هاتیە مالا خوە، ب شەڤ گۆتە ژنا خوە، کو جلێد من د ژوون بووینە، بەر شووێد من بینە، دا ئەز جلێد خوە ڤەگهوڕم، ژنێ گۆتە مەلای، کو من ئیروکە، جلێد تەیێ زێدە حەمو ل ژاران بەلاڤ کر، و نیڤەکا نانێ مالێ حازر ژی من دایە فەقیران، ئیجارێ مەلا بازید سل بوو، گۆتە ژنا خوە، تە ژی بو جل و نان دایە خەلکی، ژنێ گوتە مەلای ئیروکە تە ل مزگەفتێ شیرەت دکرن و دگۆت، کو هەرچی کەسێ تشتەکێ ژ وی زێدە هەیە لازمە د ڕیا خودێ بدەنە ژاران، ئەڤنە ژ مە زێدە بوون، من دایە فەقیران، مەلای وەکو ئەڤ خەبەرە ژ ژنێ سەح کری، خوە سل کر و گۆت، کو کچێ من شیرەت ل خەلقی دکرن ل نەفسا خوە نەدکرن، من وەسانێ وەعز کرن، کو خەلق جلێد خوەیێ زێدە و نانی بدەنە من، نەوەبوو کو تو ڕابی جلێد بەرشوویا من و نانێ زارۆکان بدەیە خەلقی، مرادا من داینا ناسان بوو، تە ئینایە ئەڤ شیرەتا ژ بۆی خەلقی، دەرحەققێ من ئیجرا کرییە.
#مەلا مەحموودی بایەزیدی# [1]
ئەم بابەتە بەزمانی (کرمانجی - کوردیی سەروو) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
ئەڤ بابەت ب زمانا (کرمانجی - کوردیی سەروو) هاتیە نڤیساندن، کلیک ل ئایکۆنا
![](https://www.kurdipedia.org/images/flags/ku.png)
بکە ژ بو ڤەکرنا ڤی بابەتی ب ڤی زمانا کو پی هاتیە نڤیساندن!
ئەم بابەتە 270 جار بینراوە
ڕای خۆت دەربارەی ئەم بابەتە بنووسە!