د وەقتێ حکومەتا ئیبراهیم پاشا ل بایەزیدێ، ژ ئاغایێد وێ دەرێ مرۆڤەکێ دەولەت دوشکونی هەبوو، پیر و حەفتێ سالی بێ حال، ناڤێ وی ئیسماعیل ئاغا دگۆتن، هەر جارنان دچە نک ئیبراهیم پاشا و ئەحوالا خوە ئیفادە دکە. پاشا زاف و هندک ددەتەوی، ڕۆژەکێ دیسانێ ئیسماعیل ئاغا دچتە نک ئیبراهیم پاشا و خەرجی یەکی دخوەزە، پاشا دبێژە وی، کو ئیروکە پارە حازر نینن، گوﮪ نادە ئیسماعیل ئاغای، ئەوژی ژڤی خەبەری سل دبە و تێتە مالا خوە کتەک دەبانجە هەبوویە، تژی دکە و هندەکێ باروت و گوللە دانینە کورکا خوە، و خەنجەرا خوە دبەر پشتا خوە ڕادکە، مەگەر مەراما وی کوشتنا ئیبراهیم پاشا بوویە، کو چڕانێ ئیجارێ خەرجی نەدایە من، ئەوی ئیسماعیل ئاغای ژنەکە پیر و کوڕەکە دەﮪ دوانزە سالی هەبوو، ئیسماعیل ئاغا تدارەکا خوە دروست دکە، ئیجارێ دبێژە ژنا خوە، کو ڕابە کوڕێ خوە ببە و هەڕە مالا شێخ ئیبراهیم، ئیجارێ ژنێ گوتییە، کو ژ بۆی چ ئەم بچینە مالا شێخی، ئیسماعیل دبێژە، ئەو ئوجاغە، هوون بچنە وێ دەرێ، ئیروکە شولەکە من هەیە، بەلکو درست ببە، ژن و کوڕ دچنە مالا شێخی، وێ ڕۆژێ ژی ڕۆژا ئەینی بوویە، کو پاشا و خەلق حەمو ژبۆی نمێژا ئەینی تێنە مزگەفتێ، وەقتێ سەلایێ، ئیسماعیل ئاغا دەبانجەیێ دبن بنیشێ دکەتە بەر پشتا خوە و خەنجەرێ ژی دکەتە بەر پشتا خوە و دچنە مزگەفتێ و لسەر ڕیا ئیبراهیم پاشا نێزوکی ڕوتنە، پاشا و خەلق ژی تێنە مزگەفتێ و نمێژا ئینی دکەن و خلاس دبن، خەلق بڕ بڕ بدەر دکەڤن، ئیسماعیل ئاغا دەرناکەڤە، وەکی پاشا تێتن، کو ژنک ئیسماعیل ئاغا ببوریت و بدەرکەڤیت، ئیسماعیل ئاغا دەبانجەیێ ددەتە تەنشتا ئیبراهیم پاشای و ئاگر دکەتن، کو ل شالا پشتا پاشای دکەڤیت و دبورە، ژ سەر پەراسوویان ل ڕۆیێ چەرمی دچە و دەرباز دبە، دگەل پاشای چل پێنجەﮪ غولامان هەبوون، ئیجارێ ئیسماعیل ئاغا دفەکرە کو پاشا ب گوللەیێ نەکەت، ددە خەنجەرێ کو ڕێ ڤە دکە، ئیبراهیم پاشا کو ب خەنجەرێ بکوژە، ئو غولام خوە داڤێ نیڤا پاشای و ئیسماعیل ئاغا، یەکی دووان ژ وان ژی بریندار دکە، و ئەوان چل پێنجەﮪ غولامان دنێڤا مزگەفتێ دا پڕان پڕان دکە، چونکو ئەو ئیسماعیل پیرو حەفتێ سالی بوو، ئیجارێ پێ ل سەججادەیەکێ د ئالە و دکەڤە، ئیجارێ غولام گەهانە سەر وی، ئێدی مەجالا ڕابوونێ نەدایێ، داینە بەر خەنجەران، دنیڤا مزگەفتێ دا کوشتن و بدەرڤە دەر ئانین، ئو لەشێ وی بئاگری سووتن، و ئیبراهیم پاشا ژی بریندار بوو، میقداری دوو مەهان موعالەجە کرن و ساخ بوو، ئو ژن و کۆڕێ وی ژی ژ باژێڕی سەرکوت کرن و دوو سێ پسمامێد وی هەبوون، ب غەیری حەق گرتن و کوشتن و مال و خانیێد وان خراب کرن، تایفەیێد ئەکرادان وەبێ عەقلن، دو ماهیا شولا مولاحەزە ناکەن، هەر چ بێتە عەقلێ وان، ئیللا دکەن، مێر بن و ژن و زاڕۆک، و دغەما واندا نینن.
#مەلا مەحموودی بایەزیدی# [1]
ئەم بابەتە بەزمانی (کرمانجی - کوردیی سەروو) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
ئەڤ بابەت ب زمانا (کرمانجی - کوردیی سەروو) هاتیە نڤیساندن، کلیک ل ئایکۆنا
![](https://www.kurdipedia.org/images/flags/ku.png)
بکە ژ بو ڤەکرنا ڤی بابەتی ب ڤی زمانا کو پی هاتیە نڤیساندن!
ئەم بابەتە 217 جار بینراوە
ڕای خۆت دەربارەی ئەم بابەتە بنووسە!