چین چین و پاچین لەبان چینش
هەی هەی جەو حەیان خەیات چینش
بەح بەح جەو شوعاع شەوق جەبینش
ئەحسەن جەو باڵای نەیشەکەرینش
ئافەرین جەو سونع حوسن ئافەرینش
ڕۊڕۊ جەو گۆنای لاڵەبەهاری
وەی وەی جەو لوان پەردەی گوڵناری
خاس خاس جەو خاڵان لاجەوەردکاری
فوغان جەو فنجان پەڕ جە مرواری
فریا جەو خەندەی شەکەرقەرینش
ئافەرین جەو سونع حوسن ئافەرینش
وەی وەی جەو گردیی فنجان زنجش
خاڵ ئەختەرئاسا نەسبەن نە کونجش
بێداد جەو زەردیی زەوج تورەنجش
پنهان نە حەڵقەی توغرای گرنجش
خۊزا وەو سڕە ها وە سەرینش
ئافەرین جەو سونع حوسن ئافەرینش
ئەڵعەمان جەو تیر دەوران دیدەش
چوون تیر و تەرکش، تەرک ماچین وەش
تەبارەک جوانف قەڵەم کشێدەش
حجاب دیدە سورمە ڕەژیدەش
هەیهات جەو کەمان هەر وە کەمینش
ئافەرین جەو سونع حوسن ئافەرینش
ئەمان جەو بافتەی توغرای دوو هەفتەش
عەقرەبان نە دەر دوو هەفتە خەفتەش
واوەیلا جەو قەوس وەهەمداڕەفتش
نە سەر تەخت عەین ئاهوان کەفتش
هیچ دەرس نەخوەندەن هېمای پەڕچینش
ئافەرین جەو سونع حوسن ئافەرینش
دەخیل خەو موژگان جەرگ دڵدۊزش
وەو بەرق سیمای سەحەرئەفرۆزش
وەو تووڕەی ماران زەهاکی تۊزش
وەو شوڵەی فام شەوانە و ڕۊزش
چمان جە نوقرەی خامەن سەرینش
ئافەرین جەو سونع حوسن ئافەرینش
ئەتوارش مەر تەور شیرین ئەرمەن
وەی تەور هەر ئەیوان خسرەوش کەمەن
نە وەخت سەیران نە سارا و دەمەن
فامداران ماتن، نوورەن؟ یا تەمەن؟
جە شەوق شوعاع شوڵەی جەبینش
ئافەرین جەو سونع حوسن ئافەرینش
وەو بەرزی باڵاش، خەڵایق جە دوور
ماچان بەدرێوەن ڕەژیدەن جە نوور
وەو ساق سیمین سەرپەنجە بلۊر
مە تاووس نە مڵک ئەیوان جای حوور
سەی یاقۆ پەی ئەو نەمەندەن دینش
ئافەرین جەو سونع حوسن ئافەرینش
#سەید یاقۆی ماییدەشت# [1]