کە مەجنون کەوتە خەڵوەتخانەیی خاک
ندایەک هات لە قوببەی بارەگای پاک
وتی: ئەی شێتە دیاری کردەوەت کوا؟
سەرێکی هەڵبڕی، ڕووی کردە لای خوا
وتی: تۆ خۆت ئەزانی شۆڕی لەیلا
سەری وا گێژ و وێژ کردم لە مەیلا
نە بیری ڕووی جیهانم بوو، نە مەحشەر
خەیاڵم عەشقی لەیلا بوو سەراسەر
لە لای خوا خۆش بوو ئەم جوابە ڕەوانە
بووە ئەستێرە بۆ ئەم ئاسمانە
چە خۆشە شۆڕشی ئەو عەشقە پاکە
بەڵێ عەشقێک کە پاک بێ دیارە چاکە
12ی حوزەیرانی ساڵی 1941 [1]
#دیوانی پیرەمێردی نەمر#
#پیرەمێرد#