داستانۊ گوڵ و بولبولی
بەشۍ چواردەهەمە
بەچە بولبول، دمای ئانەی دامانو نەسیمیش گېرت و داواو یارمەتیش وەنەکەرد، پەی ڕاو عەشقی، نەسیم بەزەییش ئاما پۊرە، چەنی مۊچیاری کەردەیش، ڕاو گوڵشەنیش نیشانە دا.
وەلحاسڵ، شەماڵ، مورادم ئېدەن
وە خاک و پای تۊم، هاناو ئومېدەن
چوون تۊ بەڵەڎ نە ڕووی جەهانیی
ڕای دەشتی گوڵشەن، پەنەم بنمانی
پەیکی خۊشخەرام، دیش بەچە بولبول
لېش بڕیان ئارام، پەی دیڎاری گوڵ
بەزەییش ئاما، وە ئاهی سەردش
وە ڕەنگ و ڕوخسار زەعیف و زەردش
واتش: ئەی عاشق خەستەی دەروون ڕېش
بۍ سەبر و ئارام، یاری مەینەتکېش
هەر ئی ڕاهە من، لېم کەردەن گوزار
ڕای ڕاسەن مەشۊ، بە شەهری گوڵزار
تەمامی ئەی ڕا، مەنزڵ، بە مەنزڵ
من لېش ئامانم، گرتەنش بۊی گوڵ
بۊی گوڵ چوون ڕەفیق، بەڵەدی ڕاکەر
یەک ڕاست مەبەرووت، بە ماوای دولبەر
بەڵام چوون یاوای، بەو ماوا و مەسکەن
بۍ ئەدەب داخڵ مەبەر بەگوڵشەن
مەوینی، بۊی گوڵ، دیارەن، جە دوور
بە سەنا، خوانیی، بشۊ، بە حوزوور
واقیف بەر جە کەید باغەبانی پیر
بە ڕشتەی تۊڕدام، ماوەرۊت بە گیر
پەند و نەسیحەت، من نە گۊشت بۊ
مەبادا، زینهار، فەرامۊشت، بۊ
ئېدش وات، دەردەم بادێ بۊ عەنبەر
بە تاو و تەعجیل، نەوجا، گوزەر کەرد
چوون بەچە بولبول، عاشقی خەمبار
پېش نیشان دریا، ئی شەهری گوڵزار.[1]