داستانۊ (گوڵ و بولبول)ی
بەشۍ هەژدەهەمە
شاعېر، چی بەشەنە، وېش ملۊنە دلۍ داستانەکی، ئاڎیچ دیارەن، پېسە بولبولی عاشقەن، مەینەت و جەفای فرەش کېشان پەی دولبەرېش. ئاڎ خەڵکی سەوگەند مڎۊ بە زاتو پاکی، کە جەلاو ئاڎیۆ لەحزیێ وەسڵی دولبەر، خاستەرەن جە موڵکو خاقان و قەیسەری.
پەروانە، دەستوور، بۍ خۊف و بۍ بیم
نە خاک پای دۊس، گیان کەرۊ تەسلیم
عاشقان، حەرفێ مەپەرسوو لېتان
ئەر ڕاس بواچدۍ، خەیر بەیۊ ڕېتان
مەدەوتان سەوگەند من وە ئیلاهیی
وەسڵی دۊس خاسەن، یا پادشایی
من سەوگەند بە زات، پادشای داوەر
حەرفێ مەواچوون، ئەر مەکەن باوەر
جە لای من لەحزەی وەساڵی دوڵبەر
خاستەرەن، جە موڵک خاقان و قەیسەر
بەشەرتێ یارێ، خۊش خڎۍ و خۊ بۊ
نەک چوون فڵانی، بەهانە جۊ بۊ
سەرکەش و لاقەید، دڵ بەڎگومان بۊ
باوەڕش نە ئایەت، نە بە قورئان بۊ
هەر قەسەم بە میهر، دڵ پارچە سەنگێ
بەهانە جۊیی، هەردەم بە ڕەنگێ
باز بە هەر جیهەت، هەرچن سەرکەشەن
هەقق لېم نەسانۊ، دڵم پۍ وەشەن
هەرچن حاڵزان و لەنجەو لار کەرەن
جەفاش، جە سەفای مەردم خاستەرەن
پەی کۊری دیڎەی حەسوودی بەڎکار
نیم گیانێ داروون، وەڕاش بۊ سەڎ جار
مەسپارووش، وە دەس یەکتای یەکانە
نیگادارش بۊ، تا دېر زەمانە.[1]