#وەلی دېوانە#
کەلبی کۊی یارم، کەلبی کۊی یارم
کەلبی پاسەبان ئاسانەی یارم
ڕەفېقی هامڕاز دۊسی دڵدارم
خاکی پات وە بان دۇ دیدەی تارم
تۊ خۊ نە وېنەی وەفاکېشانی
غەمخواری دڵسۊز گشت دڵڕېشانی
کەلبی خانەزای باوانی دۊسی
دڵگوشای یاران مەجنۇنی پۊسی
مەزانۊ قیبلەم هەر وە دەستی وېش
پەروەردەت کەردەن تا نەبی دڵڕېش
ئەگەر ئیشەڵڵا قەسدی سەرت بۊ
ڕۊ جە ڕۊی سزای بەد بەدتەرت بۊ
خەیاڵم نەبی جە وەفاداری
تۊ جە ئاسانەی دۊس دەس هۊرداری
سەبەب چېش بەی تەور هامدەردی دەردم
جە باتی یاران گشت قەوم و فەردم
تۊ جە ئاسانەی دۊس دۇر کەوتەنی
چۆنەن قەرارت چۆن سرەوتەنی
چۆنەن ئاراگېڵ وېڵی شارانی
هەر موسافېری سەر دېیارانی
سەگ وات ستەمکېش زەمانەی ناهاڵ
(پەروانە)ی جەمین شۊخی (شەم) جەماڵ
مەر لېڵاوەنی بیناییت کۊرەن
مەر ڕەزای من بۍ یا دەستی زۊرەن
بابۊی (شەم) هەوای بەغدا شارش بۍ
پەی پەسی گەلەش من دەرکارش بۍ
وە زۊر ئاوەردش هەر وەبۍ ڕەزا
تا گورگان گەلەش نەکەران غەزا
بە گوسفەندانی بابۊی دۊستەن
ڕەفېقی هامڕاز عەسا و پۊستەن
وەرنە جە کۊ بۍ وەبۍ بەهانە
بگېرۊن جە بەر ئی بېیابانە
ئازیز بە فیدای کەلب وەفادارت بام
فرستادەی ڕای بەغدا شارت بام
[1]