#میرزای لوڕستانی#

چۇن دیش بەی دەستۇر ئەمیری نازدار
نادېم بی جە وېش جە کەردەی ئی کار
بە تاقی زاناش نېیەن مەجازی
حەقیقی عېشقەن دۇر جە کارسازی
پەشیمانیش بەرد جە دڵ بەرشی دۇد
بەعدەز واقېعات پەشیمان چ سۇد
مدرا زەمانێ بۍ دەنگ و دۇوان
تا کە خاتۇ زین ئاما بە ئەیوان
بەعدەز ساعەتێ میر زینەدین بە وېش
بشی وە جانب خاتۇنی دڵرېش
ڕۇکەرد وە خاتۇن نۇری دیدەی دین
پەوسە بۍ قودرەت ڕەب ئەلعالەمین
مەئیۊس مەنیشە دل مەکەر غەمگین
پەوسە بۍ قودرەت ڕەب ئەلعالەمین
ئاما وە جواب خاتۇن نە ڕۇی قین
تۊ سەڵامەت بی نە ئەی دەھری کین
ئەمما ئستېدعام ئیدەن کە فەردا
بدەریم مەعزۇر بداریم ڕەوا
سەرکەشی گڵکۊی ئەمیر بکەرۇن
ڕەسمی تەعزېیەش بە جا باوەرۇن
ڕوخسەت دا ئەمیر خاتۇن دەر زەمان
بوېش ھۊرېزا ڕەوان بی ڕەوان
سەحەر ھۊرېزا جەمین وېنەی بەت
کېشا وەسەردا بەرقەی ئاخېرەت
چەنی کەنیزان ڕاھی بین وە ھەم
تا یاوان وە جا مەزارگەیی مەم
ھېمای دۇر بۍ دۇر کە بانگش ھۊردا
خاکی مەزارش گشت کەرد وەسەردا
خەیلێ گرەوا بە شین و زاری
خەیلێ ئاوازکەرد مەم وە زگاری
نەدی ڕەنگ و ڕۇش نەبۍ نەدایێ
غەیرەز سەنگ و خاک نەشنەفت سەدایێ
ناڵا بە دەرگای قادری بېچۇن
بە سۊزی دەرۇن ناڵا بە گەردۇن
یا ڕەب باجەتی پەیغەمبەرانت
بە ئایەی کەریم ڕای ڕەھبەرانت
بە ھەر چەند خاسان نە ڕۇی جەھانت
بە ئایەی شەریف نە ڕۇی قورئانت
دەر لەحزە نەی جا ڕۊحم بستانی
خەلاس بۊن نە جەور ئەی دونیای فانی
بە ئەمر قودرەت لامەکان ماوا
مەقرۇن وە ھەدەف ئېجابەت یاوا
ڕۊحش نە پەڕەی سینە کەرد پەرواز
نە ڕەوزەی ئېرەم جا گېرت وە دڵواز
سوپای مەوت ئاما ڕەونەقی ڕۇش بەرد
ئەعزاش کەرد وە یەخ یەخبەندانی سەرد
بە قار کۊچش کەرد نە جەوری فەڵەک
بی وە ھامنشین حۇران و مەلەک
ڕۊحش کەرد فدای بە جوانێ شیرین
لوا نە دونیا و فارغ بی یەقین
فەڵەک جەورت کەرد جەوری بېسامان
سوپەردی وە خاک نۊبەر نەمامان
چەند ھەزار غەدرت کەردەن جە یاران
ھەنی وەسەن جەور یانەت بۊ وېران
کەنیزان زانان وە مەوتی دوڵبەر
کەردشان بەو ڕۇز نەیاگەی مەحشەر
[1]