#ەلی دېوانە#
وە خاڵی تۊوەن، وە خاڵی تۊوەن
نۇر لېقای حەق وە خاڵی تۊوەن
شۊڵەی شەم وە شەوق جەماڵی تۊوەن
دەردینان وە داخ کەماڵی تۊوەن
لەیلێ کەنیزەک شیرین بەندەتەن
سەد «زڵېخا»ی (میسر) وە زەڕ سەندەتەن
«هومەیلا»ی زەریف بەڵقیسای باڵدار
گوڵشای گوڵئەندام «عوزرا»ی گوڵعوزار
یەکایەک حەیران بەژنی باڵاتەن
باڵای نەونەمام سەوڵی ئاڵاتەن
دڵ ئارامی دڵ سەمەن بۊی پەری
«مەنیژە»ی بیژەن، زوهرە و موشتەری
خەرامان حەیران حوسنی زېباتەن
بانوان تەمام گشت جان فیداتەن
حۇریان جەننەت فریشتانی فەرش
سەناخوانتەن جە زەمین تا عەرش
گوڵ جە گوڵستان وە داخی تۊوەن
داخداران وە داخ دەماخی تۊوەن
هەرچەند پەروانان هەن جە سەحرا و کۊ
گشت ماتەن جە شەوق شەم دەستۇری تۊ
من چۇن پەروانان هەر جان فیدای تۊم
حەیرانی جەمین بەزم ئارای تۊم
وە سەرگەردت بام شای سپی شەمان
سەرگەردانی تۊم دۇر جە هامدەمان
بەشقی خاڵی وېت خاتر شادم کەر
یا ڕوخسەت یا مەرگ یا ئازادم کەر
ئیسە بۊ چەنیم لادێ سازا بە
جەی گشت عەزابە گەردن ئازا بە
[1]