باخچێوە بېگەرد
ئەوەنویستەی و دەسکاریکەرڎەی: ئەسعەد ڕەشید
بەشۍ سەڎ و پەنجا و یەرەمە
دمای پەلاماردای و گاڵتەکەردەی بە یاوەرەکا پېخامئاوەری (ص) ، دوۍ جە یاوەرەکاش پېسە قاسیدێ کیاستېشا پەی لاو (نەجاشی) پاشاو حەبەشەی، پەی پەناگیری جە جەنگ و پەلاماردای قوڕەیشیە کافرەکا.
جە بانی ئەسحاب یارانی تاهیر
غەریب و دڵتەنگ ئەهلی موهاجیر
قوڕەیش مونتەزیر گرد نە جاو ڕاشان
کەردشان تەدبیر هەم پەی ئاماشان
دوو نەفەر عاقڵ دانای پەڕ هونەر
هەم مەردی مەیدان هەم زبان ئاوەر
چن هەدیەی عەجیب بۍ مەزد و مڼەت
پەرێ نەجاشیی ئەرکانی دەوڵەت
یەکێ ئیبنی عاس ئەهلی بەدیعە
ئەو یەک عەبدوڵڵا ئیبنی ڕەبیعە
عەبدوڵڵا عەمرو مەردانی سەرکەش
غەرەز تا یاوان وە ئولکەی حەبەش
وە موقەریبان پەناه بەردشان
پەی ئامای یاران ئیزهار کەردشان
ئومەرای دەوڵەت گرد بین بە کەفیل
هەدیە و توحەفیات گرد دریا تەحویل
قاسیدان سوجدە پای تەخت بەردشان
نەجاشیی جە کار حاڵی کەردشان
چن کەسێوە هەن هیجرەتشان کەردەن
پەنا بە جەناب عالی ئاوەردەن
ناگاه گرد یەکێک وېنەی دېوانە
پەشت کەردەن نە ڕووی خوڎای بتخانە
خارج جە ئایین جە گرد ئەندازە
وە دینی جەدید ئایینی تازە
ئاوەردەن جەی دەم تازە وە ڕووی کار
هیچ کەس نەشنەفتەن نە ڕووی ڕوژگار
نە تەرزی ئایین نە نام ئاورانەن
نە دینی قەدیم پېغەمەرانەن
جە ئەتراف قەوم گوریزان کەردەن
جە دینی ئەجداد وېشان وېیەردەن
تۊ هەم بوزورگان وە چەم بدارە
ئەوان وە ئېمە جە نۊ بسپارە
موعاوەدەت بان باز جە نۊ ئېشان
بشان وە مەکان ماواو جای وېشان
موقەرەبان هەم مەکەردشان تەحقیق
واتشان عەززا بدەر و تەوفیق
مەبۊ موهاجیر یەکسەر بە دەوان
ئەلئان مەسپاروم بە دەستی ئەوان. [1]