#وەلی دېوانە#
هەور نەڎۊ خەمین، هەور نەڎۊ خەمین
تۊ خەمپۊشەنی من خاتر خەمین
بۊ تا هەر دۇمان دەردین ماتەمین
وېڵ وېڵ بگېڵین سەراسەر زەمین
تۊ جە «سەما» سەیل، من جە «زەمین» ئاﮪ
هەر دۇ بکەریم ڕۇی گەردۇن سېیاﮪ
تۊ سەیلی سرشک دیدەت وە زاری
ڕېژان کەر چۇن تاو سەیلی وەهاری
من جە زەمین ئاﮪ ناڵەی نەبەردم
بخېزۊ جە دڵ هەناسەی سەردم
تا بۊ وە تۊفان تۊفی ڕەستاخېز
سېیاماڵ نە برج لېڵاخ بۊ گورېز
خېڵخانان جە دۇد ئاﮪ و ئېیەو تۊ
بېیان وە دامەن گەرمەسېر جە نۊ
تا کە کۊچی خېڵ جافی مورادی
پەیدا بان چەنی قیبلەم وە شادی
ئەو دەی گەرمەسېر هەم بەیۊ وە فەڕ
فەڕ گېرۊ جە زەوق تەتارانی «بەڕ»
هەوری نۊ بەی تەور بسازیم وە یەک
من جە ڕۇی زەمین، تۊ نە ڕۇی فەڵەک
هەر دۇمان وە جەخت بگەڕیێم وە تاو
تۊفی «زەمهەریر» پەیداکەیم جە ناو
بەی تەور تۊفانێ باوەریم وە هەم
تا خېڵان نە برج لېڵاخ کەران ڕەم
کۊچکەردەی ماڵان بېیان وە لامان
دامان بۊ وە زەوق نەوتۇڵ نەمامان
شاد بۊ وەی زامن شای شەم جەمینم
گوشادی خاتر خاری خەمینم
تا منیش وە دین دیدەی ئەو شادبام
نە جەوری گەردۇن خاتر ئازاد بام
[1]