باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و هەشتا و یەرەمە
قوڕەیشیەکۍ بڕواشان بە (عەتبە) ی نەکەردە، واتشان دیارەن تۊیچ سیحرت وەنەکریان. دیسان چیلایچۆ ئیسلام توروقینەبۍ، پەوکەی ئارامشان وەنە بڕیا، دیسان بەرنامەشان نیارە پەی کوشتەی محەمەدی.
سا وەختێ ئەسحاب چەنی پېغەمەر
مەسروور بین تەمام بە حەمزە و عوممەر
زەمزەمەی تەکبیر سەحابەی گوزین
مەشیی پەی سەمای چەرخی چوارەمین
ئیسلام ڕۊ بە ڕۊ هەر زیاڎ مەبەرد
وېرانان وە دین گرد ئاباد مەکەرد
سا چوون موشریکان دوور جە عەقاید
دیشان ئیسلام گرد، هانە تەزاید
ئایېرەی حەسەد بەرز بی جە لاشان
پەڕبیی جە غەرەز گرد موددەعاشان
دیسان هەم جە نۊ مشوورەت کەردەن
پەی قەتلی حەزرەت گرد سوگەند وەردەن
یەکسەر وە هەیهات مەجمووعەی غالیب
تا شین عەرز کەردەن وە ئەبو تالیب
واتەن: ئەی سەردار سوپای هەزارە
محەمەد وە دەس ئېمە بسپارە
چوون موخالەفەت وە بەرزی ئەو کۊ
وستەن نەمابەین دینی ئېمە و تۊ
یا کە محەمەد پېمان بسپارە
یا جەی دمای وېت وە چەم مەدارە
بڎیە ئەی گۊمە یە چەند قووڵەن
حازر بەر هەنی قەتڵ و قتووڵەن
یەقین تا زبان برازادەی تۊ
جە سەببی مەعبوود دادە ئېمەی تۊ
نەگېڵو وە شەرت ئیخلاس مەندی خاس
نمەبۊ جە دەس ئېمە ئەو خەلاس
یا بۍ بەهانە محەمەد بە دەر
یاخۊ پەرێ جەنگ وېت ئاماڎە کەر
ئەی چن کەلیمە خشوونەت ئامېز
واتشان دەردەم کەردشان ئاخېز
جە یانەی تالیب گرد بەرشین وە بەر
پەی قەتڵی حەزرەت بەستشان کەمەر.[1]