#سەیدی هۆرامی#

مەولەوی ماچۊ:
ئارێ تا پەی ئەو، من ڕۊمەن چوون شەو
شەوقەن پەی خەندەی سوبحی جەبهەی ئەو
تا وە ئەڕەی دەرد دڵەی من شانەن
زەریفتەر توڕڕەی ئەو دانە دانەن
تا من دووی سفتەی جەستەم فېشتەرەن
جەلای ئاوېنەی ئەو زیاڎتەرەن
تا سفتەی قامەت من وسمە وەشەن
ئەبرۊی ئەو وە ڕووی، دڵ کەمان کەشەن.
مەولوی وەختو خەمەکاشەنە، وەختو زامەتی و ڕەنجووریشەنە، وەختو سفتەو دەروونیشەنە، ڕۊخسارو یارەکېش گەشتەرو زوڵفېش شانەتەرو تاق و برواش کەمانکېشتەرەن، ئانە خەفەتەن پەی مەولەوی، مەینەتش زیاتەر کەرۊن.
سەیدی هۆرامیچ بە عەینو تەرزی یارەکېش مەوینۊ، تا خاڵەو ڕوومەتیش دیارتەرەبۊن، پاو دڵو سەیدیچ زیاتەر دامو زوڵفانیشۆ گیرمەبۊن، تا دیڎۍ مەسېش بە سورمەو کلو تووری ڕەژیێبان، دیڎۍ سەیدیچ زیاتەر کەم خاوۍ بان، تا شەمعەو ڕۊخساریش زیاتەر نوور ئەفشان کەرۊن، کۊگاو عومرو سەیدی زیاتەر ئایېر گېرۊن. بەڵام دماجار سەیدی هەرگیز نمەتاوۊ چا عەزابەیە وېش ڕزگارکەرۊن، چونکم دەسەڵاتو دڵیش نېیەن، ماچۊ:
ئەر فام پېش بېیا دڵەی مەجنوون خۊ
بڕیاش تەمای لاڵ شیرین ڕازی تۊ
بەڵام دەسەڵاتش نېیەن ملوو دڵیشەرە، چی؟
بەڵام بۍ سوودەن پەی (دڵ) ئی هەوەس
مەحاڵەن جە (قەند) دوور گنۊ (مەگەس) .

چراغ جەمينت، چراغ جەمينت
سەوگەند به سيمای سافی جەمينت
تا به ڕووت نەقشەن خاڵی موشکينت
پای دڵ ها نه دام، زوڵفی چين ‏چينت
تا ديدەی مەستت، پەڕ سورمەی توورەن
ديڎەی پەڕ ئەسرم، خاو جه لاش دوورەن
تا شەمعی ڕووی تۊ نوور مەوارۊ لېش
من کۆگای عومرم ئاير مەشۊ لېش
تا موژەت شاباڵ نيم نگای نازەن
ڕۊحی من چوون تەير، هەر نه پەروازەن
نمەبۊ بازاڕ شەوقی تۊ، بەتاڵ
تا من مەيلی تۊم مەشۊ نه خەياڵ
تۊ هەرسات حوسنت بۍ ئەندازەتەر
من هەردەم عەشقم جه نەو تازەتەر
ئەر فام پېش بيا، دڵەی مەجنوون خۊ
بڕياش تەمای لاڵ شيرين ڕازی تۊ
بەڵام بۍ سوودەن پەی دڵ ئی هەوەس
مەحاڵەن جه «قەند» دوور گنۊ «مەگەس»
عەشقی تۊ بەی‏تەور، من گرتەن گەردەن
هەر ئينام نه دڵ، تاکه ڕۊی مەردەن
سەد ساڵ دمای مەرگ، جه داخت نەوگوڵ
مزيۊ نه گڵکۊم، «لاله»ی داخ نه دڵ
ئەر بەی بويەری تۊ نه مەزارم
ماچوو: ئەی يارم هېمای داغدارم
هېمای جه داخت مەسۊچۊ دەروون
هېمای مەڕېزنۊ، ديڎەم سەيلی هوون
«صەيدی» زامی عەشق، تۊش هېمای وەسۊن
تاسەش به زەروور، پەی ديداری تۊن.[1]