#بېسارانی#
زڵېخام زوننار، زڵېخام زوننار
پەرۍ دینی تۊ، بەستەنم زوننار
بېخەوف جە تانەی ڕەقیب و ئەغیار
ها شیم نە مەزهەب تایېفەی کوففار
چۇن شېخی سەنعان بەرشېیام جە دین
پۊشام خەرقەی کوفر، تەرسای بېئایین
نە ڕای دینی تۊ ها بەستم کەمەر
بەرشېیام جە دین خوڎا و پېغەمبەر
پەی چېش؟ پەی حەڵقەی زوڵفی پڕ چینت
تاریکیی کوففار، دەوری جەمینت
تا کە بواچان نە ڕۇی سەرزەمین
کەسێ پەی کەسێ بەرشېیەن جە دین
هیچ نەدارۇن باک تۊم قبۇڵ کەردەن
هەر تۊم خەیاڵەن، تا وە ڕۊی مەردەن
وە گەر نە تۊ هیچ حاڵم نەزانی
بە وېنەی مەجنۇن داخ پېم مەنمانی
ئەوسا جەو دما وەسێتم خاکەن
تا مەرگی سامان دیدەم نمناکەن
تا ئەو ڕۊ خاکم بشۊ نە دیدە
ئەراگېڵی تۊم، لەب بەرگوزیدە
[1]