#بېسارانی#
زەڕگۇن کەردەوە، زەڕگۇن کەردەوە
نەووەهار زەمین زەڕگۇن کەردەوە
سۆزەی دار کېشا سەر جە پەردەوە
شەو بە شەونم، خاو دیدەش بەردەوە
خېزا بارخانەی بادی سەبایی
کەردەوە بنەی تاقە گوشایی
چەمەن بۍ مەجلیس گوڵانی وەش بۊ
توند کەرد تەنافان، هۊردا چەتری نۊ
داخڵ مەجلیسان مەستی جامی مەی
فەرما بوڵبوڵان نەوای سازی، نەی
کۊسار نمانا، ڕەنگێ زەڕگۇنی
شەقایېق مەی کەرد نە جامی هۇنی
چنۇر دەماخ بەرز، سۊسەن خېمەکۊ
ساقی شەقایېق، شەو شیفای شەوبۊ
بەڕەزایێ هەن بە ڕۇی تاوېران
تاریان چۇن تاری زوڵف خاوېران
بەڵۍ پەی کەسێ نە دڵ نەبۊش خار
بوېیارۊ بە زەوق سەرمەستی وەهار
نەک چۇن من خەریک دەردی بېدەرمان
تەن تاویای، تاو ئایېری زامان
منیش جەفا و جەور جە دۇری یاران
ڕېزا جە دیدەم ئەسرین چۇن واران
[1]