باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و شەسس و هەشتەمە
دمای ئانەی حەزرەت بە سڵامەتی وەردەمو قوڕەیشیەکارە تەشریفش بەرد، کەسێ ئاما پەی لاو قوڕەیشیەکا، پەنەش واتۍ: چەمەڕایی کۍ کەردۍ؟ محەمەد وەردەمتارە وېیەرد، مشتێ خوڵەش شانا وە سەر تا پاتان، گەر بڕوا نمەکەردۍ، دەس باردۍ سەرەتارە، وەختێ دەسشان ئارد سەرەشارە، دیشان جە فەرقشان خاک مەڕېزۊ بە وار.
ساتێ جە دمای ئەو واقیعاتە
ئەو جمهووری جەم قەومی بەڎ زاتە
شەخسێ شیی وەلای ئەو قەومی کوففار
وات: ئەی سەرداران، بۍ خەبەر جە کار
محەمەد ئاما مدرا جە لاتان
مشتێ خاکش شەند وە سەرتاکو پاتان
جەودما خېزا فەوریی تەشریف بەرد
نمەز هەنی ڕووش وە کام تەرەف کەرد
موشریکان گرد دەس ناموبارەک بەرد
یەکیەک ئیمتیحان فەرقی وېشان کەرد
دیشان سەحیحەن ئەو قەول وە گوفتار
جە فەرقشان خاک مەڕېزۊ بە وار
واتەن: نەزارەش وە ئېمە کەردەن
هەم تەشریف وە تۊی ئەندەروون بەردەن
چن نەفەر جە ئەوان شین وە ئەندەروون
هەرچی بادا بادتاکو چوون مەبۊ چوون.[1]