پاشەکەوت کەردەی
هۊرگېڵنای: گونا

تەنیا دوۍ ڕۊی مەنەبۍ پەی ڕۊو جەئەڎابیەو عالتەرین ڕەفېقیم، گردو ویر و خیاڵیم لاشوە بۍ چ خەڵاتیەش پەی پسانوو، زانېنۍ دڵش ئینا بە بەسیە (قەڵەم ڕەنگۍ) ویس و چوار دانەیېوە، چوون جاران پېوەرە قسۍ کەرېنمۍ باسش کەرۍ.
بەڵام من تەنیا هەشت ساڵېم بۍ و پووڵوو خەرجیەکەیم بەشوو ئی خەڵاتیە نەکەرۍ، تەنیا یەک ڕام بۍ، بلوو سەرو قوولەکەکەیم، قوولەکیە کە چڼە مانگۍ ئەمانەتداروو پووڵەکام بېیەبۍ، تاکو بتاوۊ دووچەرخە(پاسکیل) پسانوو.
بەڵام من گەرەکم بۍ ڕەفېقەکێم بېیاونوو بە ئاواتیش، قوولەکم هۊر گېرت و کوام زەمینەرە، ئارەزوەکەو وېم ماڕد.
زانېنۍ وەختارێو خەڵاتەکەو من واز کەرۊ، مەوۊ بە وەشحاڵتەرین کناچۍو دنیای، بەڵام ئڼە خەڵاتۍ ڕەنگاوڕەنگېشا پەی ئاوردېبۍ، کە خەڵاتوو من هەر ناما وەروو چەماش. تەنانەت خانە ئاوایەیچش چەنە نەکەردان، من پەی وەشحاڵ کەردەیش جە ئارەزوو وېم ۋېیەردۍ بېنۍ، گردو پاشەکەوتوو وېم کە پەی یاوای بە ئارەزوەکەیم جەمم کەردەبۍ، خەرجوو بەڎیی ئاوردەو ئارەزوەکەو ئاڎېم کەردەبۍ. بەڵام هەرگیز نەزاناش. من مەنانێوە و قوولەکیە ماڕیا.
ئیسە دماو ئی گردە ساڵانە ویر پینەیە مەکەروۋە، ڕوێ کە گردو بنیاڎەمەکان پەی وېشان قوولەکېشان هەنۍ، کە دلېشانەنە چېوانیە فرە گرنگتەر جە پووڵی پاشەکەوت مەکەران، پېسەو موحەبەتی، وەفاڎاری و وەشەویسی، تاکو کات و ساتوو وېشەنە خەرجش کەران.
بەڵام بڕېو جارۍ قوولەکشان پەی بنیادەمیە هەڵەی مەماڕان، پەی کەسیە کە موحەبەت و وەفاڎاری و وەشەویسی نمەی وەروو چەمانش.
وەشڵەی هۊشمابۊ قوولەکەکەما پەی کۍ مەماڕمۍ.
قوولەک کە خاڵیبۊ فرە سەخت پەڕ مەبۊوە.
[1]