#نەزهەت حالی#، بەرپرسی پێشووی ئاژانسی پاراستن، لە لاپەڕەی خۆی لە تۆڕی کۆمەڵایەتی فەیسبووک نووسیویەتی:
زۆر باوەڕم بە توانای کەسانی نیشتمانپەروەر و ئازا هەیە کە ڕێگە نەدەن ئەو هەرێمە و ئەو حوکمڕانییەمان نەک بەرەو نەمان بچێت بەڵکوو بکەوێتە سەر ڕێگای ڕاست و بە ڕاستی ببێتە هەرێمێکی بەهێزی پێشکەوتوو، کە تیایدا بە کردەی یاسا سەروەر بێت و دامەزراوەکانی نیشتمانی بن و بۆ بەرژەوەندی گشتی کار بکەن، نیشتمانپەروەر و دڵسۆزان دەتوانن پێکەوە و بە ئازایانە ڕێگە لە سیاسەتی چەوت و هەڵەکانی حوکمڕانی بگرن، ئەوان دەتوانن ڕێگە لەو هزرە مەترسیدارە بگرن کە لە سەری هەندێ کەس دایە و پێیان وایە ئەگەر حوکمڕانی بۆ ئەوان نەبێت نابێت بۆ کەسی تر بێت، ئەوە ڕێک پێچەوانەی باوەڕی شۆڕشگێڕان و ئەو شەهیدانەیە کە گیانیان بەخشی و نەمانی خۆیان ویست و ئازادی و سەربەستیان بۆ گەل ویست.
مێژوو سەلماندویەتی دەسەڵات لەسەر ناوی کەس تاپۆ نییە، میزان و پێوەر ڕا و بڕیار گەلە، هەر بۆیە گرنگ شێوازی حوکمڕانی کردن و ئەنجامەکەیەتی بۆ خێر و خۆشی و پێشکەوتنی گەل.
خودای مەزن کوردستان و کوردستانیان بپارێزێت. [1]