وتەو سەروبانی و ژیوای ئۊسای،
چن وەشبۍ وەڵۍ ئانەیە تەکنە لۆجیا و کەلوپەلە کارەباییە وەڵکۆتەکۍ و جیهناگیری یاوابۍ لاما، گردیما پېسەیۊی بېنمۍ، فەرقما نەبۍ فرەسەتێو ژیوایەنە، چن وەشبۍ خەڵک دڵوەش بۍ، سادەبۍ، شەونشینی مەنەبۍ و یانەکۍ یان چوارچەمۍ بېنۍ، نەلێبېنۍ دلۍ هۆرەکا ، یان یانۍ هەڕینۍ بېنۍ، گردیما بەڕیز ۋسېمنۍ پاڵو یوترینېیەنە، شەرم و حەیاما بۍ چەنی یانە هامسایەکاما، دیوار یان تێمانەما بێنەنە بۍ، یان درەختێ، وەختێ لوېنی سەرو درەختەکەی یەکەمجار میوەکەی پەی هامساکەی پەڕکەرینۍ، حیزبایەتی و دینداری پیسە نەبۍ، ویرما ئېمە زوو ئامایمۍ پەی شارو هەڵەبجەی قۆمەکېما سلیمانی و ئێران بېنۍ، یان هەڵەبجە بېنۍ، ئاو کارەبا نەبۍ، بە جەنجەر بیرەکېنە ئاوی هۊرکېشېنمێ پەی نان و چاشتی، دمای نیمەڕوی گردیما دەسکەرېنمۍ سوعبەت و قسۍ وەشۍ، یا باسو باخی بۍ، یان باسو سەمەری، یان باسو ئا فلیما بۍ کە پېوەرە شەوېنە سەرو بانیۆ گردیما تەماشەو بەرنامە تەرجەمە کریایەکا کەرېنمۍ، بەتەلەفزیونی سیاوچەرمە ئاییچ بەپاتری هەرمانە کەرۍ، گەڕەکێوە یەک تەلەفزیونش چەنەبۍ، فرەو جاری
هامسا یان یانەو لالۊی و مامۊی و مەتیۍ بۍ، هەرمانە یان کڵاش چنیەی بۍ یان داربڕیەی یان باخدارای بۍ یان کەشەوانی، کەس تەماڎارو مەعاشی نەبۍ، سەیارەکەم بۍ یانەبۍ ، بەمەکینە لوېنمۍ پەی مڵکی، هەرچن گرانی بۍ، بەڵام فرە پۆماوە دیارنەبۍ، خەڵک قانە بۍ، بەگرد چیوێ ساچۍ، ئیسە گرڎ چېوما هەن کەچی بەهیچی مەساچمۍ، دڵ تەنگاو یانەکېمان لوێنۍ هۊر، بەدیوار تاسەر هۆرماچنېیەن، بەینەکەما چەنی هامساکەیما هەرخەریکۍ بارکەرڎەیەنمۍ چیلا پەی ئۆ لای، چۆلا پەی ئی لای، ئۆسای ڕادوین یان تەجیلێما بۍ، ئیسە ئا سەرە ۋستمارە بەرزش مەکەرمێ بزانمۍ دنیا چېشەنە. وەختێ چەمۍ کەرمێ نیمەشەوا، بە پەلە ملمۍ واردەی حازر مارمێ و جیای هەواو گەڵا نەرەی سپلێتی دوەتەنی و جیای تەلەفزیونە سیاو چەرمەکەی سمارتیوی وەڵکۆتە ئینا دەسماوە، جیای ئەژمارای هەسارەکاو سەرو بانی فۆڵەوەرۍ و لایکەکا مژمارمۍ، هەرئانە مزانی ڕۊبیۆ، مەتاومۍ یاگۍ وېمانە جوڵێمۍ.[1]
ئەم بابەتە بەزمانی (هەورامی) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
![](https://www.kurdipedia.org/images/flags/ku.png)
ی کلیک کەرە!
ئەم بابەتە 348 جار بینراوە
ڕای خۆت دەربارەی ئەم بابەتە بنووسە!