چی ڕۊمانەو (چنارە) ی، ڕۊمانێوە زاییفەنە؟
بەشۍ: حۆتەمە
پېسەو دما قسەی:
با دڎان بنیەو پینەیرە کە ڕەزا بەهمەنی دلێو ڕۊمانەو (چنارە) ینە سەرەڕاو گردو لاوازیەکاشۆ، جە تێکنیکوو (تعلیق) ی بە وەش تەرین شێوە ئیستیفاده کەرۊ. سات بە سات مانا وزۆوە دماو، وانەری مەجبوور کەرۊ بە زووتەرین وەخت هەرمانەکۍی تەمامنۆ تاکو بزانۆ چېش قۆمیۆ و عاقیبەتوو ئی حەکایەتێ چېشەن، هەرپاسە ئی خاڵێ جە ڕۊمانەو (سیاوڕێحانە) ینە فرە ئینا وەروو چەمیوە.
جیا جە ئینیشا، چنارە، وانەری بەرۊوە پەی هۆرامانوو چننە ساڵا چېوەڵ‌تەری و بە زەینوو من نویسەر، بە کرچ و کاڵی و سەتحی و قووڵ نەدیای پەی ژیوای کاراکتەرەکا، تەنیا هەوڵ مدۆ پېسە زەنجیرێوە یوە یوەو چیوەکا پێوەن دۊ هەنترینیوەو ئیتر هەر بۊنەو ئینەیوە، فرەو چیوا دەسشنە بەر مشا. نموونەش هەر ئانێ کە سەرۆ بە کوڵی شی کریېوە.
هەرچێبۊ، (چنارە) ڕەوایەتوو ڕەنجێوەن جە کۊمەڵگاو هۆرامانینە، وەنەم مەعلووما کاک ڕەزایچ ئانە کە تاوانش و پەیش کریان جە گېڵنایوەو ئی ڕەوایەتینە درێغش نەکەردەن.
دیسان دەسوەشی و مەبارەک بایی ماچوو بە نویسەری وەشەویسی و ئاوات وازوو قەڵەمش نەبڕیۊ و بەرهەمێ عالتەرێ وەنمۍوە چەنەش.
فەرشید ڕۆستەمی.[1]