خوڎا پەکە مەوزۊ
ساڵە، ساڵەو (1996ز) ینە، جە کەمانجەڕ لاو مەردەی، خەریک بێنۍ کوختانێ سەکۊڵێ وەش کەرو پەی چاییخانەی، گېڵانی جیای نوێڵی دەسەکێ کەکەوینی وشکم دیۆ بنەنە بەرم ئاردو پژەکێم پۊرە ماڵارە، دێنېش تەوەنۍ زڕەش ئۍ، گەرەکم بۍ پی دەسەکی تەوەنی بەر بارونەو کەروشا دیوارو دمایی بە گوڵە چنورێ سەرش گېرونەو کەروش کەپرە، هەرچن تەقەلام دا فایڎەش نەبی، تەوەنەکا نەچەشێ، نیشتانیرە وردبېیانێ مڎیەو چەمۍم ئجۆ ڕیشڵێو پوشڵێ کەرا، زەلامێ کەوت وەرچەمم، سەرو هەسانېوە زیاوە، وردە وردە نزیک بیۆ، ورد بېیانێ مڎیەو (حاجی عەبدل و مەحمودو شەلەی دەرەمەڕی) ین، هەڵەبجەوە ئامانو نوېڵۍ ئینا شانەشۆ، دماو خێر ئامای، واتش: سڵامت کەروو، ئی نوێڵمە بېیەن ملرەو پڕووکیانا، وڵاخە ڕارە ئامانا، گەرەکما بەرووش پەی سلۆری پەی مەلا ئەحمەڎی برازایم، ئیسە بېیەن تۆقە ملمۆو با لاو تۆوەبۊ تاکو یۆش پەی کیانوو، منیچ نوێڵەم وەر گېرتو هەرچی هەرمانەو تەوەنا بۍ پەنەم کەردو، سەکۊڵەیچ کۊمسایش ئاماو کەردم چاییخانە، ئیسەیچ بە نامۍ چاییخانەکەو عەفانی مەشهورا، دماو دە پانزە ڕۋا جا ئامێ پەی نوێڵەکەی و بەردشا، شوکر پەی خوڎای و خوڎا حاجی عەبدولیچ بە بەهەشتەکەو وېش شاڎ بکەرۊ.
عەفان دەرەمەڕی.[1]