قۊناغەو هەرزەکاریم
بەشۍ: یەرەمە
یەکەم سەفەرو ئێرانیم
قەدەر پاسنە بۍ جە پیشهاتیوەنە دیسکیوو بێنو باڵەکۍ شانام ئېشش لا یاوابۍ و دەماری شەوەکیش گېرتەبۍ لاو وەرو ڕانی چەپیم هەستش سست بییەبۍ، کە بە جوریو فەرقو بێنو ئاوی گەرم و سەردۍو هەرپاسە هەست بە ئیشیچو چیویچ نەکەرېنۍ، وە کاریگەری مەنفیچش نیابۍ سەرو بە عزیو جە ئۆرگانای تەریيچ. چن جەلەسۍ عیلاجی تەبیعییم هۊرگیرتۍ، بەڵام بۍ فائیڎە بی. ئاخرش واتشا کابرێوی زانای عەشائیری شەمېرانەی هەن لوە لاش، منیچ بە گوشم کەردۍ لوانۍ. کابرا ماچوو (بە پەلی مریشک نەوت لە شوێنەکە بدە دوایی گەرمی بکە) ، منیچ ئامانێ نۆتەم ساوا قاچمەرە نیام لا عەلادینەکەی، تومەز وەرمم کۆتەن پۊرەو قاچیچ بە ئارەزو وېش بە قووڵیو بە دریژیی (12) سم و پانی (3) سم سۊتەبۍ، بەبۍ ئانەیە هەس بە ئازارۍ کەرو و چڵاکیۆرە. پێ ڕیشی لوانی سمېڵېچم نیێرە. وەختێ فرەش بەرد تاکو زامو سووتەکەی ساڕېژ بی. پێ هەستەکێچ، دوکتور ماچو دەمارش سیس بېیەن، فرەش پەنە مشو تاکو ژووژ بۊوە. حەر پاسەیچ بۍ، ساڵ بە ساڵ خاستەر بېیا، بەڵام هەرگیز نەبیۆ پېسەو ویش.
جەنگو میانو (ئێران و عێراق) ی حەتا ئەیی گەرم بۍو وەختو عەسکەری منیچ ڕاوە بۍ، هیچ مەشغوڵیەتیویچ ئارانە نەبۍ، بە خاسم زانا چېگە نەمەنو، بلو ئێران، بەڵکوم ئەر کریایج چاگۆ بلو پێ بەری. داوا کەردەو پاسپورتیچ بۍ سەمەر بۍ، چوونکوم یانەو ئېمە بۊنەو برایەکامۆ کە پیشمەرگۍ بۍنۍو فەعالیاتی سیاسیی زاقۍ و دیارېشا بېنۍ، مەراقەبەما سەرۆ بۍ. (بەعزیو جە هامسایەکاما چەکداری حکومەتی بېنۍ، بەڵام بۊوەو پارتی دێنۍ، وە فرە قەڎرو ئېمە گېرېنې، چن جاریو هاگاڎارېشا کەردیمۍ کە ئاگاما جە وېما بۊ، پېشمەرگۍ یام کاکەمو ئاڎۍ بە مەخفی شەوېنە سەردانما نەکەرا، هەڵبەت چېوېشا دیەبۍ یام ئەژنیەبۍ) . حەر پاسە مسەفاو مەتی خەجیجم کە بێتەلو حکومەتیەنە هەرمانەکەرۍ، بەڵام کوردێ فرە عالو دڵسوز بۍ، فرەو جاری ئاگاڎارما کەرۍ.
کە هۆرامانیچشا (1978ز) وەزنارە، نزیکو جادەکەو مەجمەعەو عەنەبېوە یانېما وەرکۆتۍ، کەچی دماوە چەنەشا ئەسایمێ دێشا بە کابرێوی چەکدارو حکومەتی، دماتەر بە تکاو ڕەجاو ئەڎێم وستیمیشا واری وارین، ئاخر یانەو مەجمەعی، ڕېک وەراوەرو ڕەبیعەکەی. (پێ زانیاریچتا کە ئېمەشا وەزنایمېرە ئا دەشتۍ، مەبەست ئانە بۍ کە جە گولانەتەرین حەرەکە یان مەقاوەمەت پېسەو بەرزانیەکاما پەنە کەرا، پۆکەی چواردۆرما بە ڕەبایی گېریابۍ) .
فاروق سان ئەحمەد.[1]