#ئێستا کچێک نیشتمانمە#

شمشاڵی عاشقێ ئەیوت:
ئەی نیشتمانی بێ گوێچکەم!
تۆ ئەتەوێ هەر چۆنێک بێ و
هەرچیەک بیت
خۆشم بوێی؟!
بە فر بی یان قوڕ و لیتە و
هەتاو بی یان تەم و مژ و
تەپ و تۆز بی و یاخود فەزایەکی بێگەرد
هەر وەکو یەک تەماشات کەم؟!
هەر چۆنی بی... خۆشم بوێی؟!
ببی بە ئەسپی قاچاخچی و باری تلیاک و
هێروین بێنی و بەری... خۆشم بوێی؟!
ببی بە چەکمەی چەرمینی ژەنەراڵێکی دراوسێ
یاخود ببی بە مێزەری فەتوایەکی ڕق و تۆڵە
من هەر ئەبێ خۆشم بوێی؟
تۆ ئەتەوێ هەر چیت کرد و
هەر چیت وت و هەرچیشت ویست
لەبەر ئەوەی تۆ نیشتمانی تاقانەی
من بیانخەمە سەرچاوم؟!
یەعنی ئەگەر بەیانییەک هەستای لە خەو
داوای خوێنی چیرۆکێکی تازەمت کرد
تا خوتبەیەکی نەخۆشت بیکاتە جەستەی خۆیەوە
بڵێم باشە و من بتدەمێ و خۆشم بوێی؟!
یاخود ئەگەر ئێوارەیەک
لەسەر خوانێ بۆ سەخاوەت
بێ بەسەرتاو بۆ یادگار
چاوێکم بدەیتە دەستی
پادشایەکی یەک چاوی
میوانی خۆت
بڵێم باشەو خۆشم بوێی؟!
من ناتوانم هەر چۆنێ بی خۆشم بوێی؟!
ببی بە دەرد و نەخۆشی بۆ قەڵەم و
ببی بە کوللە و بە ئافات بۆ سەمەل و
بۆ کتێب و بۆ ڕۆژنامە و خۆشم بوێی؟!
ببی بە دڕکی تەلبەند و
بە ساحرێکی چاوبەست و
بە لیبووکێکی سەر شانۆ و
خەوی موگناتیسیم لێ بخەیت و
تەنها تەنها لەبەر ئەوەی نیشتمانی
خۆشم بوێی؟!

#شێرکۆ بێکەس#. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە.=KTML_End=