یاڎو مرۊڤە بەرزەکا
نویستەی: #ئاکۆ مارانی#
سۊفی حەمەساڵحی تەۋېڵەی (بە بنەچە نۊدشەی)
سۊفی حەمەساڵح یۊ بۍ چە مرۊڤە سرۇشت پارېزییاکا، یۊ چە مرۊڤە وەفاڎارەکا، مرۊڤېۋ کە سەربارو تۊپۋارانی ھەشت ساڵەو کۊمارۊ ئیسلامی ئێرانی پەی سەرو تەۋېڵۍ و سەختییەکا جەنگو ئێراق- ئێرانی، ئاڎ ئاماڎە نەبۍ تەۋېڵۍ جېیابازۊ و چنی درەختا باخەکەیش (سۊفی جانەی) دەرەی وارینەنە ڕەگېش کۋێبېنېرە و تا دماجار بېیۆ بە پارچېۋ چە سرۇشتو ھۆرامانی.
مرۊڤېۋی یەزدانپەرست، ڕەبەڼ، سۊفیېۋی درۊسکار و ڕاسۋاچ و دەستپاک و ئەتوار بەرز، ئارام و خەڵکدۊس، بېوەی و خاکیی، ڕازی و گونجېیا چنی گرڎ کەسېۋی، نمۇنېۋی باڵا چە ھۆرامەکا.
ڕیشە ماش و برینجییەکەو سۊفی حەمەساڵحی چە ساڵاو کۊتایی دەھەو حەفتای و سەرەتاو دەھەو ھەشتای سەدەی ۋېیەرڎەینە، ۋېنای سرۇشتییانەو ئاڎی، کە گرڎ ۋەرەبەیانېۋ گاۋەکاش ۋەرو وېش دۍ و ڕوەو خانەقا و ۋېرەگانە دەمەو وەرپڕای مېیانو قەرەباڵخیی مېڎانو تەۋېڵېنە، ئارام ئارام ڕوەو یانە چۊڵەکەو وېیش ڕا وېش گېرۍ و وېش هۊرنەقۊرتنېنە چنین ژیۋای کەسا تەری؛ سۊفی حەمەساڵح درەختېۋی ھەمیشە سۆز بۍ، درەختېۋی ڕېخە درېژ پېسەو سۇرەچنارەکەو مېڎانو تەۋېڵۍ دۇرۆ دېیار بۍ.
کەسانېۋ کە ئارۊ کەسانی پېسەو (سۊفی حەمەساڵحی)شا چە ۋیر کەرڎېنۍ و ھەژمۇنو کولتۇری بازارییانەی ۋەرانۋەرو ۋېران بېیەی سرۇشتو ناوچەکەیشا کەڕ و کاسۍ کەرڎېنۍ و ھەرگیز ڕاگاو ژیۋای ڕەبەڼیی و سۊفییانەو سۊفی حەمەساڵحی و سەماو جاراو گەڵاو سۇرەچنارەکەو مېڎانو تەۋېڵۍ نمەیاۋانە و ھەر کەس پاپەڼیی گېیانیش پەی ۋېیەرڎەی پەڕ شانازیی وېش بۊ، مرۊڤە بازارییەکۍ ئېسەی بە شېت و وېتش مزانا، نائاگا چانەیە، کە شېتۍ جۊرېۋی باڵاو ئەۋیندارییەن پەی سرۇشتی و مرۊڤی.
بەداخۆ ئارۊ فرە فرە کەمېنۍ کەسانېۋ تواناو یاۋای بە قۊناخۊ مرۊڤ-بېیەی سۊفی حەمەساڵحەکا و سۊفی حەبیبەکا و ماما خاخەکا هەنە؛ قۊناخۊ یۊبېیەی کرڎاری و گوفتاری و ئەتواری؛ قۊناخۊ سرۇشتیی بېیەی، قۊناخۊ ئەۋەگېڵنڵی مرۊڤایەتی دزیاو وېما.
یاڎو سۊفی حەمەساڵحی پەڕ وەشی و ئاسۇڎەیی بۊ پەی گرڎو دۊستدارا سرۇشتو ھۆرامانی.[1]