دادوازی جە ژەنا
نویستەی بە هۆرامی: #بێهروز موحەمەد پوور#
دوانزە ساڵێ بێنا، واڵەکێم کتېبەکاو ڕۊزا لۆگزامبۊرگی و مێری و لێستۆن کرافتیش دێ دەسمەو، وانووشاوە. واڵەکێم، دایېمە و دەرە خەریکوو شەڕی و وەرەنگاری پەی گرتەیو حەقیش بێ. شەڕ چنی ئا سەردەمیە، ئامەیبێ دنیاوە. شەڕ چنی تاتەیوی دەسەڵاتوازی، چنی براڵەیوی سەخت‌گیری.
ئاڎە، بەڕاسی وەرەنگارێوە خاسەو ژەنا بێ. ئاڎە، شەڕکەرڎەیش جە ئەڎایم مسابێ، بەڵام من هەرگیز نەتاوام چنی پیایا شەڕ کەروون. من دڵبەسەو تاتەیم بێنا و هەر پاسە ئاشقوو براڵەکەیم.
منیچ لێرەسەختیم جە ئەڎایم بە ئێرس بەرڎەن و دایېم خەریکوو شەڕینا، بەڵام نەک چنی پیایا. من ئیمانم هەن، حەقیم مشۊ ئەوەڵ جە ژەنا گېروو!
حەقوو من ئا ژەنا گەرەشێل کەرد، گردو ورکەیشا ست‌کەرڎەیو ڕەنگەو سوورا و سپیاوی و لاکوو ناخووناشانە. ئا ژەنا، ئەڎا و واڵەو شوەکاشا ئەژدیها مزانا. گەرەکمەن حەقم چا ژەنا گېروو، ورکەو شەو و ڕۊیشا فشن‌شەوۍ و مودی تازەو جلان، ئا ژەنێ هەرگیز باشگا نەلێ و هەرگیز پاشا نەکەوت کتېب‌ورەشیەکا.
ئا ژەنا، دەروون‌ژناسی لیبراڵی وستێنش سەرو ئا باوەڕیە، پەی تاویایەو کەیف و حاڵیشا مشۊ سەردانوو پاساژەکا و کۆگاو کەلوپەل‌ئەسای کەرانێ.
مشۊ حەقم ئەچا ئەڎایا گېروو، وەڵێ زاڕۆبېیەیشانە، تاخیت کتېبێوەشا نەوانانەو و پەرە بە کاڵفامی و بێ‌شعووری مڎانێ. ژەنانێو کە دماو گلێرەوبېیەیشا واچېنێ:
مێمانداریشا تەشریفاتی نەبۍ، گۊشەو موبلەکېشا تەپ و تۆزش نیشتەبێ وەنە، فڵانەژەنی زاڕۆش نمەبۊ و ... و ئیجازەشا دا وشەو ژەنەڕینگڵێ جە ئەڎای بۊ.
حەقم ئا ژەنا چېرپا کەرد، کېشانەو بایەخ و گەورەییشا، قورسای تەڵاکەیشا زانێنێ و هەرگیز نەفاماشا تەڵا تەنیا توخمێو جە توخمەکاو خانەبەنڎی مەندەلیۆفین و ئېمە بېیېنمۍ بەها و بایەخما پنەدان و پېچەوانەیچش یانی فاجێعە.
ژەنانێو هیشتای نەفامانشا، وستەی چن ملەوان و گەردەنبەڼا جە مەراسمەکانە، ئڼەو ئانەی پێوەرە چن گجیێ کەرینە پەی مەجلیسێوە، عەجیب و دوور جە ئاوەزین.
ژەنانێو کە فریوو تەبلێغاتوو لیبراڵیشا وارد و ئیجازەشا دا بانێ مەلەکەو جوانی و پېسەو کاڵای سەرو ئەڼامیشاوە قەزاوەت کریۆ و لیدی گاگاکێ بانێ برەند!
ژەنانێو نەفاماشا وەختوو شوو کەردەیشا قەرار نېیەن پېسە کاڵای ورەشېیا و قەناعەتشا بە پیایەکا کەرد، گرڎوو دڵواستەو ژەنا پووڵ و تەڵان و شەڕی موقەدەسو ژەنێ ئینەنە و تەمام.[1]