2 هەزارو 328 بەپێی وتەی بەڕێوەبەری گشتی چاکسازیەکانی هەرێم، ئەحمەد نەجمەدین، خەرجی مانگانەی هەر سزادراوێک لەهەرێمدا نزیکەی 1800دۆلار (18وەرەقەیە)، دوا ئاماری سزادراوانی هەرێمیش 2هەزار 328 کەسە. بەڕێوەبەری چاکسازی گەوران لەسلێمانی ڕایدەگەیەنێ، لەچوار بەش، بەشێکی سزادراوەکانیان خەڵکانی بیانیە، شارەزایەکی ئابوریش بەپێویستی دەزانێ، بەمەرجی پاراستنی گیانیان، سزادراوانی بیانی ڕەوانەی وڵاتەکانیان بکرێنەوە چونکە مانگانە خەرجیەکی زۆریان دەوێت.
ئا: ئاسۆ سەراوی
ژمارەی سزادراوان و خەرجی مانگانەیان
وتەبێژی وەزارەتی کاروکاروباری کۆمەڵایەتی حکومەتی هەرێم، عەباس ئەکرەم ڕایدەگەیەنێت، 2هەزارو 328 سزادراو بەتاوانی جۆراوجۆر لەنێو بنکەی چاکسازییەکانی گەوران و ژنان و منداڵان لەهەرسێ پارێزگاکەی هەرێمیکوردستان حوکمدراون. ئەمە جگە له و کەسانەی لەبەڕێوەبەرایەتیەکانی گرتن و گواستنەوەدا ڕاگیراون، کە هەر یەکێکیش لەوانە بەسەدان کەسیان تێدا بەندیە.
بەڕێوەبەری گشتی چاکسازیەکانی هەرێم، لەوەزارەتی کاروکاروباری کۆمەڵایەتی ئەحمەد نەجمەدین لەلێدوانێکدا بۆ ئاوێنە ئاماژە بەوە دەکات، خەرجی مانگانەی هەر سزادراوێک لەهەرێمدا نزیکەی 1800 دۆلارە و ئەو سزادراوانەش کە خەڵکی هەرێمن و خێزاندارن، مانگانە 150هەزار دیناری دەدرێتە خێزانەکانیان.
ئه و بەڕێوەبەرە گشتیە جەخت لەوە دەکاتەوە هەر سزادراوێک زۆر بەباشی بەپێی بەرنامەیەکی بۆ دارێژراو خزمەت دەکرێت و جگە لەسێ ژەمە نانخواردن و پێداویستی ڕۆژانە کە لەلایەن کۆمپانیایەکی کەرتی تایبەتەوە سەرپەرشتی دەکرێت، ساڵانە دوجاریش جلوبەرگی هاوین و زستانە بۆ سزادراوەکان دەکڕدرێت ئەگەر باس لەخەرجی مانگانە هەر سزادراوێک بکەین، دەبێت لێکدانەوەی ورد بۆ هەمو لایەنەکانی بکەین، هەر لەپێداویستی ڕۆژانە و خەرجی گواستنەوە و شوێنی مانەوە و موچەی پاسەوان و زۆر لایەنی تریش، بەپێی لێکدانەوەکانی ئێمە خەرجی هەر یەکێک لەسزادراوەکان مانگانە دەگاتە 1800 دۆلار.
زۆرترینیان لەپارێزگای سلێمانیە
زۆرترین سزادراوەکانی هەرێم، لەپارێزگای سلێمانیدایە، بەپێی ئامارەکەی وەزارەتی کاروکاروباری کۆمەڵایەتی 997 کەس لەگەوران و ژنان و منداڵان بەتاوانی جیاجیا لەسلێمانی سزادراون، عەمید ئاوات شێخ کەریم بەڕێوەبەری چاکسازی گەورانی سلێمانی کە زۆرترین سزادراوەکان کە نزیکەی 840 سزادراون لەنا و بەڕێوەبەرایەتیەکەی ئەواندایە، لەلێدوانێکدا بۆ ئاوێنە، باس لەزۆری خەرجیەکانی هەر یەکێک له و سزادراوانە دەکات، ناوبراو ئەوە دەخاتە ڕو یەکێک لەزۆرترین خەرجیەکانیان، خەرجی گواستنەوەیە، هۆکاری ئەوەش وەک خۆی دەڵێت هەر سزادراوێک بچوکترین نەخۆشی هەبێت، ڕاستەوخۆ دەیگوازینەوە بۆ نەخۆشخانە، دیارە گواستنەوەش بەئۆتۆمبیلی گەورەی ئەمەریکی 8بستۆنە، بەنزین و خەرجیەکی زۆرتری دەوێت، ئەگەر لەنەخۆشخانەش بمێنێتەوە پاسەوان و خەرجیەکی تری دەبێت. لەناو ئەو چاکسازیەدا و لەکاتی ئامادەکردنی ئەم ڕاپۆرتەدا 842 سزادراو هەبو، کە بەوتەی عەمید ئاوات له و ڕێژەیەش لەچوار بەش بەشێکی خەڵکانی بیانیە کە زۆرترینیان ئێرانیە و دوای ئەوەش بەنگلادیشی و هیندیە، ئەو دەڵێت بەبڕوای من خەرجی هەر سزادراوێک مانگانە لەنێوان 1ملیۆن250هەزار دینار تا1ملیۆن 500هەزار دینار دەبێت.
ئه و باس لەوەش دەکات، کە تائێستا وەرشەی کاریان نییە و ئەو کارانەی زیندانیەکان خۆیان دەیکەن وەک کڵاش چنین و چەند ئیشێکی دەستی تر، شتێکی تەقلیدیە بەبەرنامەیەک ڕێکنەخراوە هەندێ لەسزادراوەکان کڵاش دەچنن و هەندێکی تریان ئیشی دەستی جۆراوجۆر دەکەن، بەڵام ئەوانە کاری لاوەکین و سزادراوەکان خۆیان پێیهەڵدەستن، نەک ئەوەی ئێمە وەرشەی کارمان بۆ دانابن، دوای تەواوبونی بینا نوێکەمان پێشبینی دەکەم وەرشەی کار بکەینەوە.
خەرجی ڕاگیراوانیش هەمان بڕە
جگە لەسزادراوەکان سەدان کەسی تریش لەبەڕێوەبەرایەتیەکانی گرتن و گواستنەوەدا ڕاگیراون و بەندین، هەر یەکێک لەوانەش ڕۆژانە خەرجیەکی زۆریان دەوێت. بەڕێوەبەرایەتیەکانی گرتن و گواستنەوە جگە لەهەرسێ شارەکەی هەرێم لەگەرمیان و ڕانیەش بونی هەیە. له و بەڕێوەبەرایەتیانەش بەهەمانشێوە خەڵکانی بیانیش بونی هەیە.
بەڕێوەبەری گرتن و گواستنەوەی سلێمانی لەئێستادا نزیکەی340 ڕاگیراوی تێدایە بەڕێوەبەری گرتن و گواستنەوەی سلێمانی هیوا عەلی لەلێدوانێکدا بۆ ئاوێنە باس لەزۆری خەرجی هەر یەکێک له و ڕاگیراوانە دەکات بەتایبەت خەرجی گواستنەوەیان بۆ دادگاکان، ئەمە جگە لەخەرجی خواردن و پێداویستیەکانی تری ڕۆژانەیان، ئەو دەڵێت تائێستا بەوردی لێکدانەوەمان بۆ ئەوە نەکردوە، کە هەر ڕاگیراوێک مانگانە خەرجیەکەی دەکاتە چەندە، بەڵام لەگەڵ سزادراوەکان ئەو جیاوازیەیان هەیە، ئێمە جلوبەرگیان بۆ ناکڕین، بەڵام لەزۆری خەرجی هاتوچۆدا پێشبینی دەکەم ئێمە زیاتر بین، وای بۆ دەچم هەمان خەرجی سزادراوانمان هەبێت.
پێویستە سزادراوانی بیانی بگەڕێنرێنەوە وڵاتەکانیان.
ئابوریناس و خوێندکاری دکتۆرا لەبواری ئابوری لەوڵاتی بەریتانیا جەمیل عەلی باس لەوە دەکات، لەوڵاتانی پێشکەوتو سزادراو لەبەرامبەر ئەو خەرجیانەی حکومەت بۆی دەکات، ئەویش لەبوارێکی خزمەتگوزاری گشتیدا کاری پێدەکرێت. ئەو ئاماژە بەوەش دەکات هەندێ لەوڵاتان بەمەرجی پارێزراویی گیانیان سزادراوی بیانی ڕادەستی وڵاتەکانی خۆیان دەکرێنەوە دەکرێت حکومەتی هەرێمیش کارێکی وەها بکات، ئەو سزادراوە بیانیانە بگەڕێنێتەوە بۆ وڵاتەکانی خۆیان، بەمەرجی ئەوەی گیانیان نەکەوێتە مەترسیەوە، چونکە ئاشکرایە هەر یەکێک له و سزادراوانە خەرجیەکی زۆری دەوێت.
ئه و بەپێویستیشی زانی هەر یەکێک له و سزادراوانە بکرێنەوە بەکەسێکی وەبەرهێن، تا بەتەنها بەکارهێن نەبن دەکرێت سزادراویش بکرێتەوە بەکەسێکی وەبەرهێن بەوەی لەناو زینداندا کارخانە و وەرشەی کار هەبێت، تا سزادراوان کاری تێدا بکەن، ئەمەش دو سودی هەیە، هەم لەروی دەرونیەوە سزادراوەکە ئاسودەیە و هەم سەرچاوەی دارایشی دەبێت.
لەو2هەزارو 328سزادراوەی هەرێم، 665 لەهەولێرن و 997 لەسلێمانی و 666یان لەپارێزگای دهۆکەسزادراو لەهەرێمدا هەیە و خەرجی هەریەکێکیان مانگانه نزیکەی 1800 دۆلار
...
- 13-08-2013