رێکخراوی دۆر بۆ زانیاری نەوتی کوردستان ڕایگەیاند کە بەرهەمی نەوتی هەرێم گەیشتوەتە (910) هەزار بەرمیل لە ڕۆژێکدا و و هەناردەش بۆ (740) هەزار بەرمیل بەرزبوەتەوە، پێشبینیشی کردووە بەرزبوونەوەی نرخی نەوت ساڵی 2016 هەرێم لەژێر بەندوباری بەغداد دەربهنێت و بەوهۆیەشەوە ڕێکەوتنامەی بەغداد هەڵوەشێتەوە.
بەپێی ڕاپۆرتێکی ڕێکخراوی دۆر بۆ زانیاری نەوتی کوردستان کە وێنەیەکی بۆ خەندان نێردراوە بەبەراورد بەمانگی کانوونی دووەم، بەرهەمهێنانی نەوت لە هەرێم 65 هەزار بەرمیل زیادیکردووە و زیادبوونەکەش لەکیڵگەکانی تری هەولێر شێخان بووە.
لە ڕاپۆرتەکەدا هاتووە "دابەزینی نرخی نەوت لە بازاڕەکانی جیهاندا زیانی لە داهاتی نەوتی هەرێم داوە و لە 845 ملیۆن و 500 هەزار دۆلار زیانەوە بۆ 885 ملیۆن دۆلار بەرزی کردووەتەوە".
رێکخراوی دۆر پێشبینیشی کردووە کە "بەرزبوونەوەی نرخی نەوت، ساڵی 2016 هەرێم لەژێر بەندو باری بەغدا دەردەهنێت و ئەوەش وادەکات ڕێکەوتنامەی بەغداد هەڵوەشێتەوە و جیهان، لە مساڵەوە خاوبوونەوەی گەشەی بەرهەمی نەوت دەسپێدەکات، ئەوەش سود بە هەرێمی کوردستان دەگەیەنێت".
راپۆرتەکە ئاشکراشیکردووە کە لە ئێستادا نیوەی نەوتی هەرێم لە ڕێگەی کۆمپانیای بەبازاڕکردنی عیراق سۆمۆوە هەناردە دەکرێت.
وریا هەورامی، بەرپرسی ڕێکخراوی دۆر بۆ زانیاری نەوتی کوردستان ڕایگەیاند: ڕاپۆرتەکەمان بە پشت بەستن بەچەندین سەرچاوەی دەرەکی و ناوەکی گەیشتوە به و ژمارەیە کە لەسەرو هەمویانەوە، وەزارەتی سامانە سروشتیەکان و کۆمپانیا کارکەرەکانی نەوتن.
سەبارەت بە هەناردەی غازی سروشتی هەرێم بۆ تورکیا، ڕێکخراوی دۆر بە پشت بەستن بە ڕاپۆرتێکی کۆمپانیای گەنەل ئینێرجی ڕایگەیاندووە کە "ساڵی (2018) هەناردەی غازی هەرێم بۆ تورکیا دەگاتە (4) ملیار مەتر سێجا و ساڵی (2020) بۆ (10) ملیار مەتر سێجا بەرز دەبێتەوە".
- 10-03-2015