بەدوای داسەپاندنی سیستەمی زۆرەملێی مووچە لەلایەن دەسەڵاتدرانی کوردستانەوە، فەرمانبەران وکارمەندان و خەڵکی کرێکار و زەحمەتکێش لەبەرامبەر ئەم بریارەدا، بە شێوازی جۆراجۆر ناڕەزایەتیان دەربڕیوە؛ هەر لەمانگرتن و بایکۆت وخۆپیشاندان تا دەگاتە کۆکردنەوەی دەیان هەزار واژۆ و پێشکەشکردنی دەیان یاداشتی نارەزایەتی، بەڵام حکومەتی هەرێم زۆر بێ باکەو هیچ وەڵامێکی بەم خواستەی فەرمانبەران وکارمەندان نەداوەتەوەو بایەخی بۆ ناڕەزایەتی خەڵک دانەناوە!
بەداوی ڕووداوەکانی 16 ی ئۆکتۆبەر و لەشکرکێشی حکومەتی عێراقی بۆسەر بەشیک لەناوچەکانی کوردستان و پاشان دەستپێکردنی گفتوگۆکان لەنیوان حکومەتی عەبادی وحکومەتی هەرێم لەسەر چارەسەرکردنی کێشەکان، لەوانە کێشەی موچەی فەرمانبەرانی کوردستان، حکومەتی عەبادی بەڵێنی دانی موچەی تەواوی فەرمانبەرانی دا بەومەرجەی سەرچاوەکانی داهات ڕادەستی حکومەتی ناوەندی بکرێ و ووردبینی لە لیستی فەرمانبەران و کارمەدانی هەرێمدا بکرێ! بەڵام بەدوای تێپەڕبوونی نزیکەی 4 مانگ بەسەر ئەو بەڵێنانەداو دوای بەناو ووردبینی لە لیستی مووچەدا، بڕە پارەیەکی دیاریکراویان ڕەوانەی هەرێمی کوردستان کردوە کەبەشی مووچەی تەنها بەشێکی فەرمانبەرانی هەرێم دەکات. دەنگۆی ئەوە بڵاوبوەبەوە کە ئەو پارەیە تەنها بۆ کەرتی پەروەردەو تەندروستی و بەپێی سیستەمی عێراق واتە بەبێ پاشەکەوت خەرج دەکرێ!
حکومەتی هەرێمی کوردستان کە لەژێر فشاری نەدانی مووچەدایەو هیچ وەڵامێکی پێ نیە بێجگە لە چاوەڕوانی ئەو پارەیەی حکومەتی ناوەندی دەینێرێ، بۆیە بۆ خۆدەربازکردن لەژێر ئەو فشارەدا ئەو بڕە پارەیەی هاتبوو بەپێی هەمان سیستەمی پاشەکەوتی زۆرە ملێ بەسەر فەرمانبەرانی تەندروستی و مامۆستایاندا دابەشی کرد. ئەمەش ناڕەزایەتی بەرینی کارمەندان و فەرمانبەرانی تەندروستی و مامۆستایان و کەرتی پەروەردەی پارێزگای سلێمانی و گەرمیان و ڕاپەڕین و پاڕیزگای هەڵەبجەی لێکەوتەوە. بڕیاری بایکۆتکردنی خوێندن و داخستنی سەرجەم فەرمانگەو نەخۆشخانە حکومیەکان دراو تەنانەت کارمەندانی شوێنە هەستیارەکانی وەکو (فریاکەوتنی خێرا و مناڵبوون و ژیانەوەی دڵ و... تاد.) مانگرتنیان ڕاگەیاندوە!
ئێمە لە حزبی کۆمۆنیستی کرێکاریی کوردستان لە کاتێکدا کە پشتیوانی تەواوی خۆمان بۆ خواستی مامۆستایان و فەرمانبەران و کەرتی پەروەردەو تەندروستی دەردەبڕین، هاوکات حکومەتی هەرێمی کوردستان بەرپرسیار دەکەین بەرامبەر بە خوێندن و بە ژیان و سەلامەتی هاوڵاتیان. بەرپرسیارێتی تێکچوونی شیرازەی خوێندن و ئایندەی سەدان هەزار مناڵ لاوی خوێندکار لەلایەکەوەو لەلایەکی دیکەوە ژیانی سەدان نەخۆش و مناڵ و ژن کە بەهۆی داخستنی خەستەخانەکانەوە ژیانیان دەکەوێتە بەردەم مەترسی و تیاچونەوە ڕاستەوخۆ دەکەوێتە ئەستۆی حکومەتی هەرێم و حکومەتی ناوەدندی عێراقەوە. حکومەتی هەرێم بە پلەی سەرەکی ئەرکیەتی کە مووچەی تەواوو بێ لێگرتنەوە وپاشەکەوت بۆ سەرجەم کارمەندانی تەندروستی و مامۆستایان و سەرجەم فەرمانبەران دەستەبەر بکات و هاوکات ڕێوشوێنی دەستبەجی بگرێتەبەر بۆ دابینکردنی سەلامەتی نەخۆش و خزمەتگوزاریە تەندروستیە دەستبەجێکان. هەرجۆرە خۆدزینەوەیەک لەم ئەرکەی خۆی تاوانێکە بەرامبەر بە مناڵان و هاوڵاتیانی کەمدەرامەتی کوردستانی دەکات. لەلایەکی دیکەوە سیاسەتی کاتکوشتن و یاریکردن بە قووتی خەڵکی کوردستان و بەستنەوەی بە یاری نێوان خۆی و حکومەتی هەرێم بە توندی سەرکۆنە دەکەین و تاوانێکی نەبەخشراوە دژی خەڵکی کوردستان!
حزبی کۆمۆنیستی کرێکاریی کوردستان
#20-03-2018#
Dieser Artikel wurde in (کوردیی ناوەڕاست) Sprache geschrieben wurde, klicken Sie auf das Symbol
![](https://www.kurdipedia.org/images/flags/ku.png)
, um die Artikel in der Originalsprache zu öffnen!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Dieser Artikel wurde bereits 2,346 mal angesehen
Schreiben Sie Ihren Kommentar zu diesem Artikel!