دوای ئەوەی لە بەرواری23- 8- 2018 لەلایەن نەخۆشخانەی شەهیدانی قەلادزێ ئاگاداری بەڕێوەبەرایەتییەکەمان لەسەر ئاستی دەڤەری ڕاپەڕین کرایەوە بە بوونی ئافرەتیکی سوتاو بە ناوی پەرواز حسێن تەمەن 18 سال کە پیشەی خوێندکارەو دانیشتووی گەڕەکی فەرمانبەرانی شارۆچکەی قەلادزێیە،. لە لێکۆڵینەوەکاندا دەرکەوت کە خۆی خۆی سوتاندووە، هۆکاری خۆسوتاندنەکەی دەگەڕێتەوە بۆ بوونی پەیوەندی خۆشەویستی لەگەڵ کوڕێک بە ناوی ه، و، ڕ وادیارە پێشتر وێنەی فۆتۆیی هەبووە لەگەڵ تۆمەتباره، و، ڕ، دواتر تۆمەتبار ه، و، ڕ داوای لە تاوان لێکراو پەرواز حسێن کردووە کە لەگەڵی بچێتە دەرەوە، ئەگەرنا وێنەکانی بلا‌َو دەکاتەوە لە تۆڕە کۆمەڵایەتیەکان، بەڵام تاوانلێکراو ڕازی نەبووە، پاش خۆسوتاندنی تاوانلێکراوو وەرگرتنی چارەسەری سەرەتایی ناوبراو گواستراوەتەوە بۆ نەخۆشخانەی #سلێمانی# بە مەبەستی چارەسەرکردن، بەڵام بەداخەوە لە بەرواری 24 - 8 - 2018 لە بەر زۆری ڕێژەی سوتانی تاوان لێکراو گیانی لەدەست دا.
پاش ئەوەی پەڕاوی لێکۆڵینەوەی بۆ ڕێکخرا، بە بڕیاری دادوەر بڕیاردرا بە دەستگیرکردنی تۆمەتبار ه، و، ڕ بە پێی مادەی 408 لە یاسای سزادانی عێڕاقی، لە ئێستادا تۆماتبار دەستگیرکراوەو پەڕاوەکەی لەژێر لێکۆڵینەوەی یاساییدایە.
لێرەوە بەدەرفەتی دەزانین ئاگاداری هەموو ئەو ئافرەتانە بکەینەوە کە تا ئێستا لەژێر هەڕەشەی بڵاوکردنەوەی وێنەو ڤیدیۆو نامەو هەروەها هەر ئامرازێکی تری ڕووشاندنی کەسایەتی و ئابڕوبردندان داوایان لێدەکەین بەبێ سڵەمینەوە پەیوەندی بکەن بە بەڕێوەبەرایەتییەکانی بەرەنگاربوونەوەی توندوتیژی دژبە ئافرەتان لەسەر ئاستی پارێزگاکانی #هەولێر#، سلێمانی، #دهۆک#، #گەرمیان#، #سۆران#، ڕاپەڕین، یاخود نوسینگەکانمان ئاگاداربکەنەوە لەسەر ئاستی قەزاکان، یان پەیوەندی بە بنکەکانی پۆلیسی شاروشارۆچکەکانەوە بکەن لەرێگەی هێڵی گەرمی تەلەفۆنەکانیانەوە، لەگەڵ ئەوەشدا داوا لە کچان و ژنانی هەرێمی کوردستان دەکەین بە ئاگاییەکی زۆر زیاترەوە مامەڵە لەگەڵ مۆبایل و تۆڕە کۆمەڵایەتییەکان بکەن، چونکە تۆڕە کۆمەڵایەتییەکان و ئامرازەکانی تەکنەلۆژیا گرەنتی پاراستنی تایبەتمەندی و نهێنییەکانی کەسایەتی هیچ کەس ناکەن و هەر وێنەیەو ڤیدیۆو نامەیەکی دەنگی تا ئەو جێگەیە پارێزراوە کە لە مۆبایل و کۆمپیوتەرو هەژمارە تایبەتییەکانەوە دەرناچێت و نانێردرێن بۆ کەسانی دیکە.
ژمارە تەلەفۆنەکانی بەرێوەبەرایەتییەکانی بەرەنگاربوونەوەی توندوتیژی دژبە ئافرەتان :
بەڕێوەبەرایەتییەکانی بەرەنگاربوونەوەی توندوتیژی / هەولێر 07507598172 0662567272
بەڕێوەبەرایەتییەکانی بەرەنگاربوونەوەی توندوتیژی / سلێمانی هێڵی گەرمی ژمارە 199
بەڕێوەبەرایەتییەکانی بەرەنگاربوونەوەی توندوتیژی / دهۆک 0664561315 - 07507851881
بەڕێوەبەرایەتییەکانی بەرەنگاربوونەوەی توندوتیژی / گەرمیان 07481784849
بەڕێوەبەرایەتییەکانی بەرەنگاربوونەوەی توندوتیژی / سۆران 07507077833
بەڕێوەبەرایەتییەکانی بەرەنگاربوونەوەی توندوتیژی / ڕاپەڕین 07480275081
بەڕێوەبەرایەتی گشتی
بەرەنگاربوونەوەی توندوتیژی دژبە ئافرەتان / #وەزارەتی ناوخۆ#
#18-09-2018#