دواڕۆژ، پشتیوان جەمال
بەپێی ڕاپرسییەکی سەنتەری ڕاگەیاندن و ڕوناکبیری ژنان زیاتر لە 80%ی ئافرەتان لە ترسی شێواندنی وێنەکانیان، ناتوانن وێنەی خۆیان لە پڕۆفایلی تۆڕە کۆمەڵایەتیەکان دابنێن.
پاشنیوەڕۆی ئەمڕۆ چوارشەممە 31ی تشرینی یەکەمی 2018 سەنتەری ڕاگەیاندن و ڕوناکبیری ژنان سمینیارێکی لەژێر ناوی (ئەو کێشانەی ڕووبەڕووی ژنان دەبێتەوە، دەرەنجامی تێکەڵبوون بە فەزای مەجازی- سۆشیال میدیا) ڕێکخست.
هانا شوان، بەڕێوەبەری ڕاگەیاندن لە سەنتەری ڕاگەیاندن و ڕوناکبیری ژنان بە دواڕۆژی ڕاگەیاند: ساڵێکە لەنێو 1000 ئافرەتدا دەستیان بە ڕاپرسییەک تایبەت بە دۆخی ئافرەتان لە سۆشیال میدیا کردووە و دەرکەوتووە 80% تا 85%ی ئافرەتان ناتوانن وێنەی خۆیان لە تۆڕە کۆمەڵایەتییەکان دابنێن ئەوەش لە ترسی بردنیان لەلایەن خەڵکی دیکە و شێواندنیان.
ئاماژەی بەوەکرد: هەندێک لە ئافرەتان دوای دانانی وێنەی خۆیان لە تۆڕە کۆمەڵایەتییەکان بۆ ماوەی چەند کاتژمێرێک، وێنەکانیان بردوون یان هاککراون.
هانا شوان وتیشی: توانیومانە بە هاوکاری ئاسایش هەندێک لەو پەیجانەی کە سووکایەتی بە ئافرەتان دەکەن دابخەین و چەند کەسێکیش دەستگیربکەین، بەڵام هێشتا ئافرەتانی دیکەش لەژێر هەڕەشەدان.[1]
#31-10-2018#