دەقی ڕاگەیەنراوەکە:
باڵیۆز سیلیمان ماڵئاوایی لە عێراق دەکات
خزمەتکردنم وەک باڵیۆزی ویلایەتە یەکگرتووەکانی ئەمەریکا لە عێراق لەماوەی دووساڵ و نیوی ڕابردوودا لە پێناو بەهێزکردنی پەیوەندیە ئابوری و ئاسایشی و فەرهەنگیەکانی نێوان هەردوو گەل جێگەی شانازیم بووە. ویلایەتە یەکگرتووەکانی ئەمەریکا و پێگە دیپلۆماسیەکانمان لەهەریەک لە بەغداد و #هەولێر# بە توندی پشتیوانی یەکگرتوویی و سەروەری و دیموکراسی و خۆشگوزەرانی عێراق و هەروەها هەرێمێکی کوردستانی سەقامگیرو سەرکەوتو وەک بەشێک لە دەوڵەتی عێراق دەکەن.
لەکاتێکدا من عێراق جێدەهێڵم, بیرەوەری خۆش لەزۆربەی ئەو بەشانەی عێراقەوە لەگەڵ خۆمد ا دەبەم کە سەردانم کردوون. هەمو شوێنێک کە خۆم و هاوسەرەکەم کاسرین سەردانمان کردبێت، سەرم سوڕماوە بە هەچەشنەیی وڵاتەکەو گەرموگوڕی و سەخاوەتی خەڵکەکەی. پیاسەمان بەناو باخە خورماکانی بەسرەدا کردو بە جێپێیەکانی ئیبراهیم دا هەنگاومان هەڵگرت لە ناو جێماوەکانی ئور لە ناسریە. ژیانەوەی زۆنگاوە جوانەکانی باشوری عێراقمان بینی لە شیابیش و لەسەر پێی شێرەکەی بابیلۆن وەستاین. سەردانی نەخۆشخانەی فێرکاری فەلوجەم کرد, کە بە کۆمەکی ئەمەریکا نۆژەنکراوەتەوە, هەروەها قسەم لەگەڵ پاڵەوانانی ئازای دژە تیرۆر کرد لەسەنتەری چارەسەری پاڵەوانانی بریندار لە بەغداد. تامی کەبابم کرد لە ناو بازاڕی هەولێر و وتارم لە زانکۆی ئەمەریکی لە عێراق-#سلێمانی# پێشکەش کردو سەردانی مەزاری پەیامبەر ناحومم کرد لە ئەلقۆش. شانازی بەو ئەزموون و هاوڕێیەتیەوە دەکەم کە بەرهەمی ناسینی ئەو وڵاتە گەورەو قەشەنگەیە.
لەماوەی دوساڵ و نیوی ڕابردوودا، عێراق بەرەپێشچونی بەخۆیەوە بینیوە، هەرچەندە هەندێک جار زەحمەتە ئەو بەروەپێشچونە لە چاوی سیاسەتەوە ببینیت.
کاتێک وەک باڵێۆز لە عێراق دەستبەکار بووم لە کۆتایی هاوینی 2016، #داعش# هەڕەشەیەکی بەرجەستەکراو بوو بۆ عێراق و ناوچەکە و هەروەها هێزە ئەمنیەکانی عێراق نزیک بوون لەدەستپێکردنی هەوڵە پاڵەوانیەکانیان بۆ ئازادکردنی #موسڵ#. دوای چەندین شەڕی قورس و لەدەستدانی چەندین عێراقی ئازا، هێزە عێراقیەکان بە هاوشانی هاوپەیمانی نێودەوڵەتی بەڕابەرایەتی ئەمەریکا موسڵیان ئازادکردو داعشیان وەدەرنا. بەڵام شەڕەکە کۆتایی نەهاتووە. لەسەر داوای حکومەتی عێراقی وبەهەماهەنگی تەواو لەگەڵ بەغداد, زیاتر لە پێنج هەزار کەس لەهێزەکانی ئەمەریکا بەردەوام دەبن لە هاوشانیکردن لەگەڵ هێزە ئەمنیەکانی عێراقدا و لە بنکەکانیاندا بۆ ڕاوێژ و ڕاهێنان و دابینکردنی پێویستی بۆیان بۆ دڵنیابوون لە تێکشکانی دوایی داعش و بۆ پاراستنی سنورەکانی عێراق. هاوپەیمانان کە نوێنەرایەتی 74 ووڵات و پێنج ڕێکخراوی نێودەوڵەتی دەکەن ڕاهێنانیان بە زیاتر لە 190,000 پۆلیس و سەربازی عێراقی کردووە.
لەکاتێکدا داعش پاشەکشەی پێکرا، ئاسایشی بەغداد و ناوچەکانی تری عێراق بەرەوپێشچوونی بەرچاویان بەخۆیانەوە بینی. لەڕێگەی هەوڵەکانی حکومەتی عێراق و ویلایەتە یەکگرتووەکانی ئەمەریکاو هاوشانە نێودەوڵەتیەکانی ترەوە زیاتر لە چوار ملیۆن ئاوارەی عێراقی گەڕاونەتەوە سەرماڵەکانیان بە سەلامەتی و شکۆوە. ئەو کەمینە نەژادی و ئاینیانەی کە داعش بە جینۆسایدکردن پەلاماری دان دەستیان بە هەڵسانەوە کردووە.
پەیوەندیە ئابوریەکانمان گەشە دەکەن و ئێمە لێبڕاوانە کاردەکەین بۆ هاندانی بازرگانی و وەبەرهێنان لە نێوان عێراق و ئەمەریکا. مانگی ڕابردوو باڵیۆزخانە هاوکاری لە گەڵ حکومەتی عێراق و ژووری بازرگانی ئەمەریکیدا کرد بۆ هێنانی پەنجا کۆمپانیای ئەمەریکی بۆ عێراق بۆ دەرگاکردنەوە بۆ کاری هاوبەشی بازرگانی و وەبەرهێنان.
لە هەموو ئەو پێشکەوتنانەدا، دەرفەتی بێسنور لەبەردەم هەنگاونانی عێراقدا دەبینم. عێراق وڵاتێکی دەوڵەمەندە بەسەرچاوەی نەوت و گاز و ئاو و زەوی کشتوکاڵی. عێراق خاوەنی دانیشتوانێکی زیرەک و خوێندەوار و کارکەری ماندوونەناسە. عێراق پشتیوانی ئەمەریکاو چەندان وڵاتی تری هەیە کە دەیانەوێ عێراق ببینن گەشە بکات بەرەو وڵاتێکی سەرەوەرو سەربەخۆو دیموکراسی و پێشکەوتووی ڕاستەقینە.
بەڵام عێراق ڕووبەڕووی ئاڵنگاری گەورە دەبێتەوە. لەساڵی 2025 ەوە ساڵانە یەک ملیۆن گەنجی عێراقی دێنە ناوبازاڕی کارەوە بەڵام حکومەت چیتر لەتوانایدا نابێت هەلی کار دابین بکات بۆ ئەوانەی پێویستیان بەکارە. باڵە سەربازیەکانی دەرەوەی دەسەڵاتی حکومەت چەندین ناوچەی وولاًتیان لەژیّر دەستدایە کە بووەتە هۆی ترس و ساردکردنەوەی زۆرێک لەئاوارەکان بۆ ئەوەی بگەڕێنەوە ماڵەکانیان. داعش ئێستاش بەردەوامە لە بڵاوکردنەوەی ترس لە ناوعێراقیەکان لەڕێی پەلاماری تیرۆرستیەوە. بیرۆکراسی ماندوکەرو گەندەڵی و نادڵنیایی بازرگانان و خاوەنکارانی عێراق خاو دەکاتەوە وڕێگرە لەبەردەمیان بۆ پەرەپێدانی بازرگانی و دروستکردنی هەلی کاری تازە.
ویلایەتە یەکگرتووەکانی ئەمەریکا و من خۆشم هیوای سەرکەوتن بۆ عێراق دەخوازین و بە تەوازوعەوە بۆچونی خۆم دەخەمە ڕوو کەچۆن عێراق دەتوانێت بە باشترین شێوە سەرکەوتو دەبێت.
یەکەم، عێراق پێویستە سەروەری خۆی بپارێزێت لەڕێی دابینکردنی ئاسایشی سنورەکانی و بنیاتنانی ئەو هێزە ئەمنیەی کە تەنها وەڵامدەرەوەی حکومەت دەبێت.
دووەم، عێراق پێویستە ئابووریەکەی لە گەندەڵی و بەربەستە بیرۆکراسیەکان ڕزگاربکات کە ڕێ لە خەڵکی بازرگان و خاوەنکاری عێراق دەگرن لە پەرەپێدانی کارەکانیان و دروستکردنی کاری تازە.
سێیەم، عێراق پێویستە کراوە بمێنێتەوە بەڕووی جیهانداو و کاریگەری خۆی لەسەرانسەری جیهاندا فراوانتر بکات.
هەندێک دەیانەوێت عێراق تەها یەک هاورێی هەبێت. ویلایەتە یەکگرتووەکانی ئەمەریکا دەیەوێت عێراق سەدان هاوڕێی هەبێت و ئەو بۆچوون و نمونانە لەهەریەکێکیان وەربگرێت کە زۆرترین سودی بۆ ئاسایش و کۆمەڵگاو ئابوری عێراق هەیە.
لەماوەی داهاتوو، عێراقیەکان هەڵبژاردەی گەورەیان لەبەردەمدا دەبێت بۆ ئەوەی هەڵیبژێرن. هیوادارم هەموو جارێک بڕیاری ئەوە بدەن کە عێراق هەڵبژێرن.[1]
#05-02-2019#