پێویستیی بە ئەقڵییەتێکی ڕەخنەگرانەی ڕادیکاڵی شۆڕشگێڕانە هەیە...
دەسەڵاتی باشوور، وەک خڵتە و بەرهەمی هەموو دەسەڵاتەکانی تری ئەم ناوچەیە تا دێت زیاتر لەناواخنی خۆیدا دادەڕزێت، لەگەڵ خۆیشیدا تاک و کۆمەڵگەش دادەڕزێنێت. ئەم دەسەڵاتە دەستبەرداریی هەموو بوارە سیاسی و قانوونی و خزمەتگوزارییەکان بووە و گەیشتۆتە ئاستێک ئیدی دەیەوێت تەنیا به بوارە ئیسخباراتیی و سەرکوتکارییەکانی خۆیەوە بەردەوام ببێت. بێگومان ئەمجۆرە دەسەڵاتانەش لەهەموو جۆرەکانی تری دەسەڵاتدارێتی تەمەنکورتتر و ڕیسواتر دەبن.
ئەم دەسەڵاتە لەم قۆناخەی ئێستای خۆیدا لەجاران زیاتر دەستی بە دەستگیرکردن و ڕفاندنی ڕۆژنامەوانان و چالاکوانانی سیاسی و مەدەنی کردووە، تەواو هاوئاهەنگ لەگەڵ هێزە داگیرکارەکان - بەتایبەتی هێزە سەربازیی و ئیستخباراتییەکانی تورکیا و ئێران – لەهەوڵی لەناوبردنی بزووتنەوەی ئازادی گەلەکەمانە لە هەموو کوردستاندا. بۆئەوەی زیاتر تەمەنی خۆی درێژە پێبدات؛ وا خەریکی جۆرێک لە سەودا و مامەڵە و قوماربازییە لەسەر ئه و دەستکەوتانەی گەلەکەمان لە باشوور و ڕۆژئاوا و باکوور و ڕۆژهەڵات. بچووکترین پرۆژە و بەرنامە و پلانی بۆ خزمەتگوزاری و بەره و پێشەوە بردنی مافپەروەریی و ئازادی بیر و ڕا و ئازادی ڕێکخستنبوون و چالاکی نواندن نییە. هێشتاش بێباکە له و دۆخە ناهەموارەی چینی ناوەندی کۆمەڵگە (کە زۆر بەی مووچەخۆری دەسەڵاتن ) تێیدا دەژیت. لەبەرامبەر خەڵکی هەژار و بێکار و بێدەرامەتدا، وەک دەسەڵاتێکی تاڵانکار و دژە هەژاران، لەبێباکییش دەرچووە و چۆتە قۆناخی ئەوەی سیستەمێکی مۆدێرینی کۆیلایەتی جێگیر و ڕەوا بکات. لەم دۆخەدا ڕۆژانە ڕێژەی کوشتنی ژنان، دەستدرێژی بۆسەر ژنان، دژواربوونی دۆخی منداڵان، پیر و پەککەوتە و خاوەن پێداویستانی تایبەت تادێت دژوارتر و بەئازارتر دەبێت. دۆخی ژینگە و سروشتی ئەم وڵاتە لەخراپترین دۆخی خۆی دایە و تادێت دەرفەتی ژیان لەم ژینگەیەدا کەمتر دەبێتەوە. ڕێژەی نەخۆشییە جەستەیی و دەروونییەکان پەتائاسا لەتەشەنەسەندن دان ، شەپۆڵەکانی جێهێشتنی وڵات تادێت فراوانتر دەبێت. ئەوە بوارەکانی پەروەردە، ڕۆشنبیری، کشتوکاڵ، خزمەتگوزاریی ڕێگاوبان و تەندروستی و ئاو و کارەبا و ئاسایشی خۆراک و ئابووری لەخراپترین دۆخی خۆی دایە.
سەرەڕای هەموو ئەمانە؛ کەچی دەسەڵاتدارێتی باشوور دەیەوێت بە سەرکوتکردن و ڕەشبگیری و تۆقاندن درێژە بەتەمەنی خۆی بدات. ئەم دەسەڵاتە ئەوەندە بێباک و ملهوڕە، تەنانەت زۆر بەئاسانی و بێویژدانانە گەمارۆی ئابووری و سیاسی دەخاتە سەر ئاوارەکانی وارگەی پەنابەرانی مەخموور، کە زیاتر لە 15 هەزار کوردی وڵاتپارێزی خەڵکی باکووری کوردستانی تێدا دەژیت. هەروەها ڕۆژانە بۆردومانی گوندەکانی سەرسنوور دەکرێت و خەڵکی مەدەنی تێدا شەهید و بریندار دەبێت، کەچی نەک هەر باکی بەهەموو پێشێلکاریی و داگیرکارییە نییه و لێی بێدەنگە ، بەڵکو بەهەموو شێوەیەکیش هاوکار و یارمەتیدەریشیەتی.
ئه و دۆخەی ئەم دەسەڵاتدارێتییە دروستیکردووە تادێت کۆمەڵگەکەمانی لە ڕاستینەی کۆمەڵایەتییبوونی خۆی دوورخستۆتەوە. واتا کۆمەڵگەی بەئاقاری داڕزاندن و داتەپین ئاراستەگیر کردووە و بەها کۆمەڵایەتی و ئینسانیی و نەتەوەییەکان بەخێرایی دەهاڕێت و پێوانە ویژدانیی و ئەخلاقییەکان لە داڕمانی زیاتر دان. شاڵاوە فەرهەنگییە دەرەکییەکانیش بەردەوام پەلاماری بەها فەرهەنگییەکانی کۆمەڵگە دەدەن و ئەمڕۆ مەترسیدارترین جۆری داگیرکاریی، کە داگیرکاریی فەرهەنگییە، هەژموونی خۆی تادێت زیاتر دەکات. ئەوەی ئه و مەترسیانەی زیاتر و ترسناکتر کردووە؛ نەبوون یان لاوازیی؛ هزری ڕەخنەیی و بەرەنگاریی، ڕۆحی بەرگریخوازی، ڕێکخستنی بەرگریخواز و چالاکیی بەرگریخوازییە.
بۆیە دۆخی ئێستا کە دۆخێکی گێژاویی و تاریکە، بەرلەهەموو شتێک پێویستیی بە ئەقڵییەتێکی ڕەخنەگرانەی ڕادیکاڵی شۆڕشگێڕانە هەیە تا بتوانێت ئەم دۆخە بە ئاراستەی وەرچەرخان و گۆڕانکاریی ببات، ئەقڵییەتێک لەدەرەوەی ئەقڵییەتی دەسەڵاتخوازێتی و پاوانخوازێتی بتوانێت کۆمەڵگە بکاتە تەوەری تێکۆشانی خۆی. ئینجا پێویستیی بە وەرچەرخانێکی ڕیشەیی لەڕووی هزری، سیاسی، کۆمەڵایەتی و فەرهەنگی هەیە، تا بتوانێت ئه و شۆڕشە زیهنی – ویژدانی کۆمەڵایەتییە بەرپا بکات کە ئازادی، دادپەروەری، یەکسانی و ژینگەپارێزی و بەیەکەوەژیانی دیموکراتیانە بە ئامانج وەربگرێت[1].
Dieser Artikel wurde in (کوردیی ناوەڕاست) Sprache geschrieben wurde, klicken Sie auf das Symbol
, um die Artikel in der Originalsprache zu öffnen!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Dieser Artikel wurde bereits 2,225 mal angesehen
Schreiben Sie Ihren Kommentar zu diesem Artikel!