لە يادی سی و دوو ساڵەی شاڵاوە بەدناوەکانی ئەنفالدا، بە ڕێز و شکۆوە هەموو ئه و قوربانييانە بەبير دەهێنينەوە کە له و تاوانکاری و جينۆسايدەدا گيانيان بەخشی و سەری ڕێز و نەوازش لەبەردەم گيانی پاکی ئەوان و تەواوی شەهيدانی کوردستان دادەنوێنين، سڵاو و ڕێز بۆ خێزان و کەسوکاری سەربەرزيان.
ئەنفال يەکێک لە سامناکترين و دڕەندەترين تاوانەکانی مێژووە کە ئافرەت، پياو، منداڵ و پيری نەناسيوە و بێباکانە هەمووانی پێکەوە بەره و مەرگی بەکۆمەڵ ڕاپێچ کردووە، هەروەها ژينگە و ئاوەدانی تەخت کردووە و هەموو شوێنەوارێکی ژيانی سڕيوەتەوە.
ئه و سياسەتە ڕەگەزپەرەستەی بەعس بووە هۆی ئەوەی تەنيا لە شاڵاوەکانی ئەنفالدا زياتر لە (180) هەزار هاووڵاتيی کوردستان گيانيان سپارد و کۆمەڵکوژ و زيندەبەچاڵ کران، جگە لە وێرانکردنی هەزاران دێهات و دەيان شارۆچکەی کوردستان.
لە کاتێکدا ئەمڕۆ يادی ئه و ئازيزانە و تەواوی شەهيدانی کوردستان دەکەينەوە، دەبێ هەموو هەوڵێکمان بۆ ئەوە بێت کە به هيچ شيوەيەک ڕێگە نەدرێت جارێکی ديکە نە گەلی کوردستان و نە هيچ گەل و مللەتێکی ديکەی سەرزەمين، ڕووبەڕووی ئه و تاوانکاری و جينۆسايدە ببنەوە، دەبێ دەوڵەتی عێراقيش وەک ئەرکی ياسايی و ئەخلاقيی خۆی، ئاوڕێکی جددی لە کەسوکاری قوربانييان بداتەوە و قەرەبوويان بکاتەوە.
هەر وەک چۆن دادگای باڵای تاوانەکانی عێراق ئەنفالەکانی بە جینۆساید و تاوانی دژی مرۆڤایەتی و تاوانی جەنگ ناساند، داواکارين کۆمەڵگەی نێودەوڵەتيش ئه و تاوانکارييانە بە جينۆسايد بناسێنێت، لەم پێناودا بەردەوام دەبين و هەموو هەوڵێکمان دەخەينە گەڕ، هەروەها بەردەوام دەبين بۆ دۆزينەوەی ڕوفاتی شەهيدان و گێڕانەوەيان بۆ ئامێزی نيشتمان.
لەم يادەدا دروود بۆ گيانی شەهيدان کە هەميشە لە يادەوەريی گەلی کوردستاندا بە زيندوويی دەمێننەوە.
نێچيرڤان بارزانی
سەرۆکی هەرێمی کوردستان
#14-04-2020#
Dieser Artikel wurde in (کوردیی ناوەڕاست) Sprache geschrieben wurde, klicken Sie auf das Symbol
, um die Artikel in der Originalsprache zu öffnen!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Dieser Artikel wurde bereits 2,165 mal angesehen
Schreiben Sie Ihren Kommentar zu diesem Artikel!