قوماش 20
نووسینی: #ئوسامە جەمیل عەلی#
ئەو شەوەم لە ماری بازۆی بەڕێ کرد، هەتا نوێژی بەیانی نەنووستین، هەر قسەمان کردیە و پلانمان دانایە و بازۆ پڕۆڤەی پێ دەکردم کوو لەگەر قادرە فەندی دانیشم و قسەی بکەم، تەواو هیلاکی کردم، گۆتم: بازۆ بەسە وازم لێ بینە، با نوێژەکەی بکەم و بڕەکی بنووم، چیدی ماندیم بکەی، بەخۆم دەبمە قادرە فەندی و دەچمە کنی و دەرێم: کوڕم، دیارە کیژەکەی منت بە دریە لۆیێ هاتیە پێش! ئەویش هەتا مست دەگری لە چڕوچاوم دەدام و کەپوو و دەوم پڕی خین دەکا، ئەوجا پشتی ملم دەگری و بە شاپان هەتا دەرکەی حەوشێم دەبا، مندارەکانیشی لە باتی بێن لەبە دەستیم دەرینن، بە پێلەقان دەکەونە سەرم و فڕێم دەدەنە سەر جادەی! بازۆ گۆتی: تەبعەن دەبی ئەوەش لە پێش چاوی خۆت دانێی و خۆشەویستی قوربانی دەوێ، ئەتوو دەتەوێ مەم لە زیندانی بمری و فەرهاد کووتکەکی لە سەری خۆی دا و مامەر بدرێتە بەر تفەنگان لۆ ئەسمەری و نەجمەدین بیست چەقووی لە هەناوی بدرێ لۆ کیژخانی و ئەتووش بە سووک و سانایی بەفرینی بینی! گۆتم: بەفرین نیە هەورینە، بەس ئەتوو پێم برێ ئەو نەجمەدینە کێ یە بیست چەقوویان لە هەناوی دایە، لۆ هەتا ئێستا گێم لێنەبووە لاوکەک حەیرانەکی بەسەر دابرێن؟ گۆتی: لۆ ئەمن بەخۆم دەزانم نەجمەدین کێ یە هەتا بەتوو برێم، ئەوە هەر ناوەک بوو لۆم هات، بەس دەزانی چیە، ئەگەر چووی داوای دەستی بەفرینت کرد، داوای هەناریش بکە لۆ من! گۆتم: وەچاکە بچم نوێژەکەی بکەم، ئەو بەفرین بەفرینەی توو سەری من دەخوا!
نوێژم کرد و لێم پارداوە، وەختەکی بەخەبەر هاتم سعات یازدەی بەیانی بوو، تەماشام کرد بازۆ هێشتا پرخ و هۆڕیتی، گازم کرد: بازۆ، کورە بازۆ! سەری قیت کردەوە و گۆتی: سعات چەندە؟ گۆتم: یازدە، دە هەستە دەی، ڕێم لۆ بکەوە بابڕۆمەوە مارێ، چونکە لەوێ شەڕەکی گەورە چاوەڕێم دەکا، گۆتی: بەخۆم و تەورداسەوە بێم لەگەرت؟ گۆتم: نا چاوەکەم نا، پێویست ناکا، بازۆ گۆتی: ئەوە نانی بەیانی فت، نانی نیوڕانێ بخۆ ئەوجە بڕۆ! گۆتم: ناوەڵلا هەر ئێستا دەڕۆم! بازۆ قیت بۆوە و لە ژۆرێ چووە دەرێ ڕێم لۆ بکاتەوە، ئەمنیش هەستام جلکم لەبەر کرد و چاوەڕێی بازۆی بووم برێ وەرە دەرێ! هەندەی نەبرد بازۆ هاتەوە و گۆتی: دەبڕۆ دەفن بە دەی، بەس لەبیر نەکەی زۆر بە مسەقەفی لەگەر قەدوری قسەی بکە، خۆت مشەوەش نەکەیی و بە نەرم و نیانی بدوێ! گۆتم: خوا کەریمە، با بزانین کوو دەبی.
چوومە دەرێ، دیتم پلکە گەلاوێژ وا کەرستەی دۆڵمەی دانایە و قۆر و باسکی لێ هەرکردیە، گۆتم: پلە گەلاوێژ ئەمن دەبی بڕۆم، بمبورن ئەوشۆ بوومە ئەزیەتیش لەسەرتان! گۆتی: قەت نایێلم بڕۆی، دەبی نیوڕانێ دۆڵمەکەی لەگەمە بخۆی ئەوجە بڕۆی، ئەمن لەبەر خاتری توو دۆڵمەی لێ دەنێم! گۆتم: گەلە مەمنون مارت ئاوابی، هەونکە داک و بابم مشەوەش بووینە، لە دونێوە نەچوویمەوە مارێ! وەلحاسر بە هەزار دەردەسەری تانیم پلە گەلاوێژی ڕازی بکەم ئیزنم بدا، خواحافیزیم کرد و چوومە دەرێ، بازۆ هەتا دەرکەی حەوشێ لەگەرم هات و گۆتی: زوو خەبەرم بدەوە بزانم چت کرد و گەیشتیە کێ، گۆتم: خەمت نەبی یان لە سەرچۆپی بادانێ دەمبینیەوە یان لە قەبرستانی شێخ ئەحمەدی!
یاغر یاغر شۆڕ بوومەوە لۆ لای مارێ، گەیشتمەوە مارێ و دەرکەم کردەوە و چوومەوە ژۆرێ، دیتم بابم وا لە حەوشێ ڕاوەستایە و ئاگری دەکاتەوە، کلکی گۆپاری بە دەستی گرتیە و بە ڕاست و چەپ ڕایدەوەشێنێ، داکیشم وەکی کێشکەی هەردەلەرزی و ناوێری فزەی بکا، نێزیک بوومەوە و گۆتم: سەلاموعەلێک! بابم زۆر بە تووندی گۆتی: ئەوە لە دونێوە لە کێندەرێی کورە؟ گۆتم: وەڵلا لە ماری بازۆی برادەرم بووم، چووم سەرەکم لێدا، لەمێژبوو نەمدیتبوو، گۆتی: ئەتوو دیارە بازۆت پێ پیاو ترە لە بابت و مێوانی بابت، لۆیێ ئەمە بەجێدێلی و دەچیەوێ! گۆتم: ئەستەغفیرەڵلا بابە، ئەمن حەدم نیە ئەوها فکر کەمەوە! گۆتی: داکت پێی نەگۆتی: ماری مام حەمەدەمینی دێن؟ یەعنی نەتدەزانی لەبەتوو دێن، کوڕم ئەتوو چت دەوێ لەوەی زیاتر، کابرا کیژی خۆی بە کراسی بەری پێشکەش کردی! گۆتم: بابە ئەمن پێم گۆتی: خەجەم ناوێ، نامهەوێ یەعنی نامهەوێ! گۆتی: ئەدی کێت دەوێ ئەفەندی، بەمن نارێی کێت دەوێ، کیژی کافرۆشی؟ گۆتم: بەخۆت دەزانی کێم دەوێ، دە وەڵلا هەورینم لۆ نەینن، بەحەیاتی ژنێ ناینم و دەبی ئەو سەرەی بە ڕەبەنی سپی کەم! بابم هەموو قالبی دەهەژا و دەستی وەکی بی ناو ئاوێ دەلەرزی! گۆتی: دەوەڵلاهی مادام ئەوهات لێکرد بشمکوژن کیژی قادرە فەندیت لۆ ناینم، ئەوجە هەرچی دەبی باببی، گۆتم: دە وەڵلاهی مادام ئەوهای لێهات کیژی قادرە فەندی نەبی نامهەوێ، ئەگەر ئەو عەسرەش بەخۆم نەچوومە داخوازی مووی ئەو سمێرانە لە من نەهاتبی!
یاغر یاغر: هێواش هێواش، هێدی هێدی.
گۆپار: گۆچان.
کیژی کافرۆشی: ئەفسانەیەکە و گوایە زۆر جوان بووە و ئەفسەرێکی بەریتانی لە شاری #هەولێر# ڕفاندوویەتی و بردوویەتە بەریتانیا.
قەبرستانی شێخ ئەحمەد: گۆڕستانێکی گەورەیەو دەکەوێتە باکوری هەولێر.
ڕەبەن: سینگل.
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!