قوماش 65
نووسینی: #ئوسامە جەمیل#

بەپەلە تەکسیەکم گرت و چوومە ماری قادرە فەندی، تەماشام کرد پێش ماریان چۆلە و هیچ قەرەبارغی لێنیە، چووم لە دەرکەم دا، مێرد مندارەک هاتە دەرێ، چاک و چۆنیم لەگەر کرد و گۆتم: داکت لە مارێیە؟ گۆتی: بەرێ، فەرموو وەرە ژۆرێ! چوومە ژۆرێ و لە هۆدەی مێوانان دانیشتم، وەختەکی فەوزیە خان هات، چاوی بەمن کەت فرمێسک لە هەردوو چاوی دابارین، بە زۆری خۆی گرت و بەخێراتنی کردم، فەوزیە خان لەپاشی قادرە فەندی ڕەحمەتی، ڕەش داگەڕابوو، جلکەکی ڕەشی لەبەر کردبوو، هەردوو چاوی سۆر هەرگەڕابوون، دیاربوو هی فرمێسکان بوو، گۆتم: فەوزیە خان کووی؟ گۆتی: دەبی کووبم کوڕم، چرای مارێم کوژاوە و ئاگردانی گەورەم کۆربۆوە، حەیف لۆ قادری بە خەمان بمری، گۆتم: ئیشاڵلا خوای گەورە لێی خۆشبووە و جێگای بەهەشتە و سێبوری هەموو لایەکیش بدا، گۆتی: وەڵلاهی کوڕم، خەمی زریانی لە لایەکی، خەمی هەورێش لەلایەکی، گۆتم: ئەدی هەورین وەزعی کووە؟ گۆتی: برێم کووە، کووی برێی خراپە، ئەو مێردە بێ نامووسەی زۆری ئەزیەت دەدا، پێرێ بە سەردان هاتەوە، لاچاوەکی ئەوەندە ئەستوور ببوو، گۆتم: لۆ؟ گۆتی: مێردەکەی سەرخۆش بووە، هەورینیش ئامۆژگاری کردیە واز لەو حارەی بینی، ئەویش توڕە بووە و هەتا مست گرتیتی لەلا چاوی دایە، وەی چاوت داکت کۆرەبی هەورێی من، کوو بەپێی خۆت، خۆت هاویشتە ناو ئەو ئاگرەی! ئەمن لەبنی درمەوە ئازارم پێگەیی، ئەو هەورینەی دەتگۆ پەڕی گوریە و ناسکی وەکی خۆی نەبوو، هەندە سپی بوو، دیقەتت بدابایێ دەتدیت کوو خین لەناو دەمارەکانی دێ و دەچی، ئێستا کەتیتە دەست خۆفرۆشەکی سەرسەری بێ نامووس! سەرم لە فەوزیە خانی نێزیک کردەوە و گۆتم: هەرکووی هەیە بزانە وەناکەی سبەی شەوێ هەورین لە مارێ نەبی و بێتە ئێرە! فەوزیە خان ڕەنگی تێکچوو، گۆتی: ئەو چشتەی نەکەی کوڕم، حەیای هەردوولامان دەچی، وەڵلا ئەو سەگبابەش هەموومان دەکوژی! گۆتم: غەرەت مەڕۆ فەوزیە خان، ئەمن بەتەمای ئەوەی نیمە هەورینی هەرگرم، لەوەی تەئمین بە، بەران خەبەرەکم زانیە، پێشمەرگە بەتەمانە بەسەر ئەو جاشەی دادەن و بیتۆپێنن، دەترسێم هەورین لەوێ بی و گووللەکی پێ بکەوی! فەوزیە خان ڕەنگی بەتەواوی پەڕی، گۆتی: ئەی کۆرەبم هەورۆ، باشە کوڕم ئەتوو ئەوەت لەکێ زانیە؟ گۆتم: خەبەرم هەیە، بەس فەوزیە خان وریا بە کەس نەزانی، وەڵلا کەشف بی هەموومان تێدەچین، ئێستا هەرکووی هەیە قەناعەت بە هەورینی بکە، سبەی شەوێ لەوێ نەمینێ! گۆتی: باشە کوڕم باشە، خوا بتپارێزی یا ڕەبی، وەڵلاهی چەندی خەمی هەورین و زریانیمە، دە هەندەش خەمی توومە، ئای کوڕی گەورەم کوو ماری دریان وێران کردی، خوا سەبەب کاری بگری، ڕەبی فەیرۆز بتبینم و داوە پرچەکت بە سەری وەنەمینێ!
خواحافیزیم کرد و هاتمە دەرێ، تەماشا باخچەکەی ناو ماری قادرە فەندیم کرد، دیتم ئەوانیش وەکی فەوزیە خانی هیشک بووینە و بەرەو پیری مردنێ دەچن، بەینەکی تەماشا دار پرتەقارەکانم کرد و ئەو دار پرتەقارانەی خانیە کەونەکەم بە بیرهاتەوە کە ڕۆژگارەک بوو قادرە فەندی بە هێمنی لەبن سێبەریان دادەنیشت و هەورینیش هێد هێدی ئاوی دەدان! فەوزیە خان زانی تەماشای دار پرتەقارەکان دەکەم و خەمی لێ دەخۆم، گۆتی: پاشی قادری نەک هەر ئەمن، داروبار و ژیان و مار و عاسمانی سەر سەریشمان هیشک بوو، هەر دوو چاوم پڕی ئاو بوون و گۆتم: خوای گەورە سەبر و ئارامیتان پێ ببەخشی فەوزیە خان!

چوومەوە لای مارێ، بابم دانیشتبوو، داکیشم دیاربوو خەریکی دروست کردنی موڕەبای بوو، سەلامم لێکردن و بە خێراتنەوەیان کردم، بابم گۆتی: کوڕم وەرە لە تەنیشتم دانیشە با دوو قسەت لەگەر بکەم، حەز دەکەم بە هوردی گێم بدەییێ، ئەوە داکیشت لێرەیە، چووم لە تەنیشت بابم دانیشتم و گۆتم: فەرموو بابە! گۆتی: کوڕی گەورەم، ئەتوو پیاوەکی ئاقر و تیگەیشتی، خیندن تەواو کردیە و ڕۆشنبیری، مندارەکی نەزان نی هەتا برێمە توو ئەوها نا ئەوها، ئەتوو بە خۆت دەزانی هەورین بووە نسیبی ئەو جاشە هیچ و پووچەیی و ئەمە دەرەقەتی نایێین، بە خوای کوڕم بە چاو قووچانەکی دەتانی بزرت بکا و بە حەیاتی چاوت بە دنیایێ نەکەویتەوە، ئەمەش هەرچی هێز و توانای خۆمان هەیە بەکاری بینین، ناتانین هەورینی لەبن دەستی ئەو پیاوەی دەرینین، تازە ئەو چووە ڕێی خۆی و دەستی لێ بشۆ، کوڕم ژیان ئەوهایە، مادام کیژە چووە ڕێی خۆی ئەتوو بەتەمای چی؟ ئەوجە ئەگەر بەگێی بابت دەکەی فکر لە ژیانی خۆت دەکەیەوە و بڕیارەکی دەدەیی و ژنەکی دەینی، ئەمن نارێم ئیللا و بیللا دەبی خەجەی کاک حەمەدەمینی بینی، داکیشت وەنارێ، ڕاستە ئەمە حەز دەکەین ئەوی بینی، چونکە خزمی خۆمانە و باپیرانیشمان گۆتیتیان: پاروو لە زاری بەربیتەوە بکەوتە کۆشی، ئەمان وەڵلاهی ئەگەر دە ساری دیش ژنی نەینی ملت لەبەر ملی نانێم برێم هەر دەبی خەجەی بینی! داکم مراکی تێکدانی موڕەبایەکەی دانا و هاتە تەنیشتم، گۆتی: کوڕم زۆر حەز دەکەم هەتا سەرم ئاوا نەبووە، ئێک دوو منداری ناسک و نازداری توو ببینم، کوڕی گەورەم سەر هەرینە و خوای ببینە، بە خوای تازە هەموو دنیا خڕبیتەوە هەورێی پێ لەبن دەستی ئەو کابرایەی نایێتە دەرێ، بە گێی مە بکەی زەرەر ناکەی، لەمێژە گۆتیتیان: ئەوەی بەگێی داک و بابی بکا قەت زەرەر ناکا! بەینەکی بێدەنگ بووم، ئەوجە گۆتم: دایە، بابە، قسەینگۆ سەر سەر و سەر چاوم، ئەمن کێم هەیە لەنگۆ زیاتر، ئەنگۆ هەموو کەسی منن و هەر ئەنگۆش خەمی من دەخۆن و لەبەر منیش هەموو هەناوتان بوویتە خەم، بەران ئەنگۆ باش دەزانن ئەم درم گەلە بەخەمە، زۆری دەوێ هەتا بتانم هەورینی لەبیر بکەم، لەبیر کردنی هەورینی لەکنە من یەعنی مردن، تازە ئەو لەگەر خینم تێکەر بووە و بە ئاسانی لە ژیانی من ناچتە دەرێ، ئاسان نیە پاشی هەورینی بتانم باوەش بە ئێکەکی دی بکەم و بێجگە لە هەورینی لەگەر ئێکی دی سەر لەسەر بالیفەکی دابنێم، دەزانی تازە زۆر زەحمەتە هەورین ببیتە ئیمن، بەران زۆر حەز دەکەم سەبرەکم لێبگرن، هەتا دێمەوە سەرەخۆ، ئەوجە بڕیارەکی دەدەم، ئیشاڵلا ئەو بڕیارەش بەدرینگۆ دەبی، تەئکیدیش بن شتەکی ناکەم درینگۆی پێ بێشی، داکم و بابم سەریان ماچ کردم و فرمێسک بە هەردوو چاویان داهاتە خوارێ و گۆتیان: ڕەبی کوڕم خوا لە پەنای خۆت بگری!
ئەو شەوەم تێپەڕاند بە فکر کردنەوە لە قسەکانی داک و بابم، ئەوانیش لە لایەکی ڕاستیان دەکرد، ژیان بەردەوامە و لەسەر کەس ڕاناوەستی، بەران برینی هەورینی هەند قۆرە هەتا خوا دەرێ بەس، ئای هەورین چمان بەسەرهات، ئەمە بەرنامەمان کوو بوو، ئێستا چمان بەسەر هات، دەزانم بەقەدەر ئەوەی درم لای تووە، ئەتووش ئەوهای، بەران زۆر جار ژیان بەکەیفی مە نابی و بای زەمانە بەلەمی درمان لەناو دەریای خۆشەویستی داوێتە دورگەکی، پڕی دڕندە و مشک و مار و حەزیایە!
ڕۆژی پاشتر وەختی هێوارێ پەڕیمەوە ئەوبەری جادەی، بزانم دەنگ و باس چیە و دەبی بازۆ ئەوشۆ چبکا، دیتم جادە پڕی جاش و ئەمن و مەفرەزە خاسەیە، هەر لەخۆمەوە ترسەک لە درم دروست بوو، ئەتوو برێی حوکمەت زانیبی شتەک ڕوودەدا، دەبی بازۆوان خەبەریان لی نەدرابی، دەبی لەناوخۆیان جاسوس و خائین نەبی و خەبەری دابیتە حوکمەتی ئەوشۆ شتەک لە هەولێرێ ڕوودەدا و وریابن! بەڕاستی مشەوەش بووم و نەمدەزانی چبکەم و کێوە بچم، لەناو ئەو هەموو هەراو هۆریایەی پیکابەکی عەسکەری پڕی جاشم دیت، هەموو جۆرە چەکەکیان پێبوو، وەکی دیقەتم دا ئەو سەرۆک جاشەی هەورینی لەمن زەفت کرد، وا لە پێشەوە دانیشتیە و جیهازەکی لاسرکی بە گێی وەنایە و قسان دەکا!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!