بابەت: کورتە چیرۆک
نووسین: #فاروق هۆمەر#
ڕێکەوت: #27-02-2019#
ئەو ڕۆژە بەدرێژایی کاتەکان بەوپەڕی نائارامییەوە بەناو ماڵەکەدا دەهاتم و دەچووم و زوو زووش تەماشایەکی دەرگەی دەرەوەم دەکردو لەبەرخۆمە دەمگووت، خودایە ئەمڕۆ پوورم نەیەت بۆ ماڵمان. خودایە تۆ بە قسەی منی بچکۆلە بکەو منیش بەڵێنت پێدەدەم جارێکی دی درۆ نەکەم. خودایە ئەگەر تۆ خۆشی بخەیتە دڵی منەوە، منیش دڵی تۆ هەرگیز ناڕەنجێنم. پەیمان بێ، پەیمان، ئەوە دوایین درۆم بێ. سوێند دەخۆم ئەمجارە شتێکی وا دووبارە ناکەمەوەو بۆ هەتا هەتاشە لە خۆمت ناڕەنجێنم. هەر ئەمجارە با ئەو نەیەت! چ دەبێ ئەگەر ئەمڕۆ ئەو نەیەت. ئەو هەموو ڕۆژێکی هەینی بەرلەوەی بچێتەوە ماڵی خۆیان، سەرێکی ماڵی ئێمەشی دەداو کەمێک لای دایکم دەمایەوە. پوورم لە نزیکی ماڵی ئێمەوە مامۆستای سەرەتایی بوو، هەر کاتێک دەهات بۆ ماڵمان سەد فلسیشی دەخستە گیرفانی منەوە. ئەو ڕۆژگارە سەد فلس دڵخۆشییەکی زۆر بوو، بۆ منداڵێکی شەش حەوت ساڵانی وەک من. کەچی ئەو ڕۆژە پێمخۆش نەبوو پوورم بێت بۆ ماڵمان و دڵیشم بەهیچ جۆرێک بۆ ئەو سەد فلسییەی ئەمجارەی دانەدەچڵەکی، چش لەو سەد فلسییە من ئەمڕۆ نامەوێ و با لە کیسم بچێت. ئاخر من گوڵمەزێکی گەورەترم نابۆوە، کە دەرکەوتنی پوورم هەموو شتێکی لێدەشێواندم.
بەرەبەیانییەک بەرلەوەی بچمە دەرێ بۆ قوتابخانە، دایکم حەوسەدو پەنجا فلسی دابوومێ، لەڕێگەوە بیدەم بە پوورم تاوەکو لەگەڵ ماڵی خۆیان دا کیلۆیێک گۆشتیش بۆ ئێمە بکڕێ. کاتێک گەڕابوومەوە ماڵێ، دایکم گووتی: “پارەکەت گەیاند؟” منیش نازانم چۆن ئەو درۆیەم کردو گوتم، “بەدڵنیاییەوە پارەکەم گەیاندووە” نازانم دایکم لەو کاتەدا بەچییەوە سەرقاڵ بوو، دیاربوو بۆی نەکرابوو لێم بڕوانێ، دەنا زۆرباش دەمزانی ئەوەندە سوور هەڵگەڕابووم و ئەوەندەش دڵم کەوتبووە پەلە پەل خەریکبوو لەناو گیانم دەهاتە دەرەوە. لە ترسان ڕوخساری خۆم شۆرکردبۆوە خوارێ و چاوەکانیشم پڕیان بوو لە شەرمەزاری. لەوەی دەکرد لەو کاتەدا دایکم کوێرایی داهاتبێ، دەنا چۆن هەستی بە شپرزەبوونی من نەدەکرد نازانم دایکم لەو کاتەدا بەچییەوە سەرقاڵ بوو، دیاربوو بۆی نەکرابوو لێم بڕوانێ، دەنا زۆرباش دەمزانی ئەوەندە سوور هەڵگەڕابووم و ئەوەندەش دڵم کەوتبووە پەلە پەل خەریکبوو لەناو گیانم دەهاتە دەرەوە. لە ترسان ڕوخساری خۆم شۆرکردبۆوە خوارێ و چاوەکانیشم پڕیان بوو لە شەرمەزاری. لەوەی دەکرد لەو کاتەدا دایکم کوێرایی داهاتبێ، دەنا چۆن هەستی بە شپرزەبوونی من نەدەکرد.
باشە ئەو درۆیە چی بوو کردم، بۆ خۆشم نەمدەزانی ئەو بڕوبیانووە هەڵبەستراوە لە کوێوەو چۆن کەوتە ناو سنگمەوەو بەو خێراییە ئەندێشەی داگیرکردم. ئیدی شتێک بوو هەر بۆ خۆی هات و لە دەمم دەرپەڕی. تازە گەڕانەوەی بۆ نەبوو. شتێک ڕووی دابوو، داپۆشینی مەحاڵ بوو. بەراستی من نەمدەزانی چی بڵێم و چۆن ئەو درۆ گەورەیە دابپۆشم کە پارەکەم نەگەیاندووە. ئیدی دایکم کەوتە چاوەڕوانی هاتنی گۆشت و گۆشت هەر نەدەهات. ڕۆژێک و دووان تێپەڕین و گۆشت نەگەیی. ئێ خۆ من خۆم دەمزانی گۆشت بە هیچ جۆرێک ناگات. دایکم، گوناهی چییە گۆشت ناگات. خۆ پووریشم کەس پێی نەگووتبێ لە خۆیەوە گۆشتمان بۆ ناهێنێ. ئەوەی لێرەدا خراپ بوو، تەنیا من بووم.
گرفتەکە بەو جۆرە دەستی پێکرد: ئەو ڕۆژە شتێکیان دابووە من، بە هەموو ژیانم نەمدیبوو. ئەو پارە زۆرە لە گیرفانما جێی بە خۆی نەدەگرت. زوو زووش دەستێکم دەهاویشتە ئەو گیرفانەوە کە پارەکەی تیابوو، دەمویست دڵنیابم لەوەی هەر لەجێی خۆی ماوە. زۆریش دەترسام لە پەشۆکان دا پارەکەم لێ بکەوێ، یاخود کەسێک گومانم لێ بکات کە پارەیێکی وا زۆرم پێیە، بێت و بە فێڵێک لێم بسەنێ. لەڕێی قوتابخانە، لە نزیکی نەخۆشخانەی شیرەکەوە، کاتێک دەڕۆیشتم پاسکیلخانەی غەفور لەوێ دا ڕێگەی پێدەگرتم. ئەو پاسکیلێکی سێتایی بریسکەداری جوانی لەبەردەم دوکانەکەی دانابوو، کەس نەبوو لەو کاتەدا سواری بێ. هەستم کرد پاسکیلێکی بێنازە و کەسێک دەبێ خۆشی بوێ. ئیتر من لێی نزیک بوومەوەو دەستێکم هاویشتە سەر پاسکیلەکەو لە دەسکە ستیلەکانی خوردبوومەوە. لە سێ چەرخە خڕو نازدارەکانیم دەڕوانی. من چوومە لای کاک غەفورو داوام لێکرد چۆن دەکرێ سواری ئەو پاسکیلەبم. کاک غەفور تەماشایەکی کردم و گووتی:
“هەر سوڕێکی بە پانزە فلسە’’
“من دەمەوێت سوڕێک بڕۆم’’
“پارەت پێیە؟’’
“بەڵێ پارەم پێیە’’
“هەتا کوێ سوڕێکە؟’’
کاک غەفور لەگەڵم هاتە دەرەوەی پاسکیلخانەکەو دەستێکی بۆ کۆتایی شەقامەکە بەرزکردەوە.
“تا ئەوێ دەڕۆیت و دێیتەوە. لەوە زیاتر ناڕۆی’’
“زۆرباشە، بۆ خۆشم هەر تا ئەوێ دەچم’’
من پەنجا فلسییەکم فڕێ دایە ناو چنگی ئەو پیاوەوەو ئەویش بەخێرایی هاویشتییە ناو گیرفانییەوە. خەریک بوو بەدەم خۆشییەکەوە ڕابکەم و باوەش بکەم بە پاسکیلەکەدا، ئەو خێرا شانێکی گرتم و هەموو گیانم لەگەڵی لەرزی. لە شوێنی خۆم خەریک بوو ووشک دەبووم. هێندەی نەمابوو دڵم بڕژێتە خوارێ.
“تۆ دڵنیای لە پاسکیل دەزانی؟’’
“زۆرباشی لێدەزانم، هیچ خەمت نەبێ’’
کەسێک لە ژوورەوە کاک غەفوری بانگ کردو کاتێکم زانی لەپڕێک دیار نەماو لەبەرچاوم وون بوو. ئەوجا هەناسەیەکی قووڵم هەڵمژی و هەستم بە ئازادییەکی خۆش کرد. هێندەی چاوتروکانێک خۆم هاویشتە سەر پاسکیل و بۆی دەرچووم. تا سەری کۆڵانەکە چووم و گەڕامەوە. چەند زوو کاتەکە بڕایەوە. هێندەی یەک و دوو هەموو شتێ تەواو بوو. خۆشییەکە خەریک بوو بەتەواوی خاڵی دەبۆوە. من دڵم نەدەهات پاسکیلە بگەڕێنمەوە. ئاخر هێشتا سوکناییم بە سواربوونی پاسکیلەکە نەشکابوو. بۆچی ئەمجارەش دووبارەی نەکەمەوە. ئیدی جارێکی دیش سواری بووم و دووبارەم کردەوە. هێشتا دڵم هەر سواربوونی پاسکیلی دەخواست و پێیدەگووتم نەکەی جارێ بیگەڕێنیتەوە. بەخۆمم دەگووت نەخێر نایگەڕێنمەوە. ئیدی ئەو ڕۆژە نەچوومەوە بۆ قوتابخانەو هەرچی پارەیێکم پێ بوو هەموویم دا بە پاسکیل.
کاتێکیش پارەکەم تەواو بوو، من هێشتا هەر حەزم نەدەکرد پاسکیلەکە بگەڕێنمەوە. دەمزانی کاتی هاتنی پوورم نزیک بۆتەوە. بەڵام خۆ من هەرچیم بکردایە بۆم نەدەکرا ڕێگە لە هاتنی بگرم. لەپڕێک لە دەرگە دراو پوورم خۆی کرد بەژوورا. منیش بەهێواشی خۆم هاویشتە ژووری سەر هەیوانەکەو دەرگاکەم لەسەر خۆم داخست. کاتێک دایکم درۆکەمی بۆ دەرکەوت، زوو زوو بە تاکە کەوشێکەوە دەهاتە بەر پەنچەرەکەو بە دوو چاوە شینەکانیەوە کە هەرچی دەکرد نەیدەتوانی ڕق لە ناوخۆیاندا هەڵبگرن، دەیگوت “هەر لەوێ بە تا باوکت دێتەوە”.
ئیدی لەو کاتەوە وەک زیندانییەک لەم ژوورەدا چاوەڕوانی گەڕانەوەی باوکم دەکەم و تا ئەویش نەگەڕێتەوە کەس نازانێ سزای ئەو گۆڵمەزەی ناومەتەوە چی دەبێ.[1]