نامۍ: محمەمەڎ سڵېمان
نازنامۍ: سەیدی هۆرامی
نامۊ تاتەی: حاجی سەیېڎ مەحمووڎ
یاگۊ پېڎابېیەی: خانەگا
یاگۊ مەرڎەی: ڕەزاۋ
سەیدی هۆرامی نامېش محمەمەڎ سڵېمان کوڕو حاجی سەیېڎ مەحمووڎی بېیەن.
ساڵۊ 1778 پېڎایی چە (خانەگا) یېۋە چە دەگاکا ناوچەو ھۆرامانی پېڎابېیەن. بە زاڕۊڵەی چە لاو فرەو مەڵاکا ناوچەو ھۆرامانی وەنەنش و پەی تەمام کەرڎەی وەنەی فرەو ناوچەکا کورڎەسانی گېڵان.
نازنامۊ ئی ھۊنیەرە بەھرەدارەیە چە (سەید)ی عەرەبیی'یۆ ئامێنە.
ماۋېۋی فرە لاو مەڵا جەلالو خورماڵی مەنەنۆ و ئاڎی مۊڵەتو مەڵاییش پنە بەخشان.
دماتەر پەی ناوچەو وېشا گېڵانۆ و ژیۋای وېش بە وانە ئەۋەۋاتەی و ھەرمانۊ ھیتیاریی بەسەربەرڎەن.
فرە کەسۍ چە ناوچەکا تەرو کورڎەسانی'یۆ پەی وانە وەنەی پەی لاو ئا مۊسا توانادارەیە لۋێنۍ.
شېخ عوسمان شېخ سەراجەدینی تەۋېڵەۍ یۊ چە وانیارەکا سەیدی ھۆرامی بېیەن،کە دماتەر سەیدی ھۆرامی بۊ بە خەلیفەو ئاڎی.
سەیدی ھۆرامی ھۊنیەرېۋی نامدارو کورڎی بېیەن، گرنگییەکەش ئانە ھەن، کە بە ھەر دۋە شېۋە ھۆرامییەکۍ ھ‌ۆرامی تازە و ھ‌ۆرامی ۋەڵین (ئاڤێستایی) ھۊنیێش ۋاتېنۍ و نۋیستېنۍ.
بەشی فرەو ھۊنیاکاش باسو جوانیی سرووشتو کورڎەسانی و دڵداری کەرا. چە زۋانی فارسیی و عەرەبیی'چەنە توانیێۋی بەرزەش بېیېنە و بە ھەر دۋە زۋانەکە ھۊنیێش ۋاتېنۍ و نۋیستېنۍ.
ئا ھۊنیەرە گۆرە ساڵۊ (1846ز) کۊچی دمایینش کەرڎەن و جە دەگاو (ڕەزاۋ)و ناوچەو ھ‌ۆرامانی بە خاک ئەسپاریان.
نموونېۋ چە ھۊنیێکا سەیدی ھۆرامی:
دیم شیرین نیشتەن، دانە مڎۊ پېش
هارەش هار کەرڎەن، دەور مڎۊنە وېش.[1]